രുദ്രപ്രയാഗ്: ശൈത്യകാലമെത്തിയതിന്റെ പശ്ചാത്തലത്തിൽ ചാർധാം ക്ഷേത്രങ്ങളിലേക്കുള്ള തീർത്ഥാടനത്തിന് താത്കാലിക വിരാമം. കേദർനാഥ്, യമുനോത്രി, ഗംഗോത്രി ക്ഷേത്രങ്ങൾ ഇതിനോടകം അടച്ചുകഴിഞ്ഞു. ചാർധാമുകളിലെ മറ്റൊരു പ്രധാന ക്ഷേത്രമായ ബദരീനാഥ് ഉടൻ തന്നെ അടയ്ക്കും.
ക്ഷേത്രങ്ങൾ അടയ്ക്കുന്നതിന് മുന്നോടിയായി നടക്കുന്ന പ്രതിഷ്ഠാ ചടങ്ങുകളിൽ പങ്കെടുക്കാൻ പ്രതികൂല കാലാവസ്ഥയിലും നിരവധി തീർത്ഥാടകരാണ് കേദാർനാഥിൽ എത്തിയത്. ഇക്കഴിഞ്ഞ തീർത്ഥാടന കാലത്ത് ഏകദേശം 19.5 ലക്ഷം തീർത്ഥാടകർ ഇവിടെയെത്തിയെന്നാണ് കണക്ക്.
ശൈത്യകാലത്തിലേക്ക് കടന്നതോടെ കേദാർനാഥിലും പരിസര പ്രദേശങ്ങളിലും കടുത്ത മഞ്ഞുവീഴ്ച ആരംഭിച്ചിരിക്കുകയാണ്. ശൈത്യകാലത്ത് ക്ഷേത്രം അടച്ചിടുന്ന വേളയിൽ ഉഖീമഠിലെ ക്ഷേത്രത്തിലാകും കേദാർനാഥിലെ പൂജകൾ നടക്കുക. ഇതിനായി ക്ഷേത്രത്തിലെ പഞ്ചമുഖി ഡോലി ഉഖീമഠിലേക്ക് മാറ്റുകയാണ് പതിവ്. ഒക്ടോബർ നവംബർ മാസങ്ങളിലായി അടയ്ക്കുന്ന ചാർധാം ക്ഷേത്രങ്ങൾ ശൈത്യകാലം അവസാനിച്ചതിന് ശേഷം ഏപ്രിൽ-മെയ് മാസങ്ങൾ എത്തുമ്പോഴാകും ഇനി തുറക്കുക.