ക്രിക്കറ്റ് ഇതിഹാസം സച്ചിൻ തെണ്ടുൽക്കറുടെ മകൾ സാറ തെണ്ടുൽക്കർ സമൂഹമാദ്ധ്യങ്ങളിൽ സജീവമാണ്. ഇപ്പോൾ തന്റെ പേരിൽ എക്സിലുള്ള വ്യാജ അക്കൗണ്ടിനെതിരെ രംഗത്തെത്തിയിരിക്കുകയാണ് സാറ. ഇൻസ്റ്റഗ്രാം സ്റ്റോറിയിലൂടെയാണ് സാറ വ്യാജ അക്കൗണ്ടിനെതിരെ രംഗത്തെത്തിയത്. എക്സിൽ തനിക്ക് അക്കൗണ്ടില്ലെന്നും ഡീപ് ഫേക്ക് സാങ്കേതിക വിദ്യ ഉപയോഗിച്ച് തന്റെ ചിത്രങ്ങൾ പ്രചരിക്കുകയാണെന്നും സാറ ഇൻസ്റ്റയിൽ കുറിച്ചു.
ഡീപ്പ് ഫേക്ക് സാങ്കേതികവിദ്യ ഉപയോഗിച്ചാണ് എക്സിലുള്ള തന്റെ ഫോട്ടോകൾ ആ അക്കൗണ്ട് ഉപയോഗിച്ചിരുന്ന ആൾ പ്രചരിപ്പിച്ചിരുന്നത്. ക്രിക്കറ്റ് താരം ശുഭ്മാൻ ഗില്ലിനെ പ്രോത്സാഹിപ്പിച്ചുകൊണ്ടുള്ള ആശംസകൾക്ക് പിന്നിലും ആ വ്യക്തിയാണ്. നമ്മുടെ സന്തോഷങ്ങളും മറ്റും പ്രകടിപ്പിക്കാനുള്ള ഇടമാണ് സമൂഹമാദ്ധ്യമങ്ങൾ. പക്ഷേ ഇന്റർനെറ്റിന്റെയും സാങ്കേതികവിദ്യയുടെയും ദുരുപയോഗം വളരെ അധികം ആശങ്ക സൃഷ്ടിക്കുന്നുണ്ട്. എക്സിൽ സാറ തെണ്ടുൽക്കർ എന്ന പേരിലുള്ള അക്കൗണ്ട് എന്റേതല്ല. എക്സിൽ എനിക്കൊരു അക്കൗണ്ടുമില്ല. ഇതിൽ പരിശോധന നടത്തി എക്സിന്റെ അധികാരികൾ സാറ തെണ്ടുൽക്കർ എന്ന പേരിലുള്ള അക്കൗണ്ട് ഇല്ലാതാക്കുമെന്ന് കരുതുന്നു. സാറ ഇൻസ്റ്റഗ്രാമിൽ കുറിച്ചു.