അടുത്തിടെ റിലീസ് ചെയ്ത ചിത്രങ്ങളിൽ ഒടിടിയിൽ കാണാൻ ആരാധകർ കാത്തിരുന്ന ഒരു ചിത്രമാണ് കുടുക്ക് 2025. കൃത്യമായി പറഞ്ഞാൽ 2022 ഓഗസ്റ്റിലാണ് ചിത്രം തീയറ്ററുകളിൽ റിലീസ് ചെയ്തത്. പിന്നാലെ ചിത്രം ഒടിടിയിൽ എത്തുമെന്ന് പ്രതീക്ഷിച്ചെങ്കിലും വൈകുകയായിരുന്നു. എന്നാൽ നീണ്ട ഒരു വർഷം കാത്തിരുന്നിട്ടും ചിത്രം ഒടിടിയിൽ എത്തിയിരുന്നില്ല.
എന്നാൽ അടുത്തിടെ ചിത്രം ഉടൻ ഒടിടിയിൽ എത്തുമെന്ന് അണിയറ പ്രവർത്തകർ അറിയിച്ചിരുന്നു. റിലീസ് തീയതിയും പ്രഖ്യാപിച്ചിരുന്നെങ്കിലും അന്ന് നിരാശ മാത്രമായിരുന്നു ലഭിച്ചത്. ചില കാരണങ്ങളാൽ ചിത്രത്തിന്റെ റിലീസ് മാറ്റിവെക്കുകയായിരുന്നു. ഒടുവിൽ ആരാധകർ ആകാംക്ഷയോടെ കാത്തിരുന്ന കുടുക്ക് 2025 ഒടിടിയിൽ എത്തിയിരിക്കുകയാണ്. സൈന പ്ലേയാണ് കുടുക്കിന്റെ സ്ട്രീമിംഗ് സ്വന്തമാക്കിയത്.
ഒടിടി സ്ട്രീമിംഗിനോട് അനുബന്ധിച്ച് ചിത്രത്തിന്റെ ട്രെയിലറും കഴിഞ്ഞ ദിവസം റിലീസ് ചെയ്തിരുന്നു. കൃഷ്ണ ശങ്കർ, ദുർഗ കൃഷ്ണ എന്നിവരാണ് ചിത്രത്തിലെ കേന്ദ്ര കഥാപാത്രങ്ങൾ. നവാഗതനായ ബിലാഹരി സംവിധാനം ചെയ്ത ചിത്രത്തിന്റെ രചനയും ബിലാഹരി തന്നെയാണ്. 2025 കാലഘട്ടത്തിന്റെ പശ്ചാത്തലത്തിലാണ് ചിത്രത്തിന്റെ കഥ പറയുന്നത്. മനുഷ്യന്റെ സ്വകാര്യതയാണ് ചിത്രത്തിന്റെ പ്രമേയം.
