അഹമ്മദാബാദ്: ഗുജറാത്ത് ടൈറ്റൻസ് വിട്ട് ഹാർദ്ദിക് പാണ്ഡ്യ മുംബൈ ഇന്ത്യൻസിലേക്ക് ചേക്കേറുമെന്ന അഭ്യൂഹങ്ങൾക്ക് വിരാമം. താരത്തെ ഗുജറാത്ത് ടൈറ്റൻസ് ടീമിൽ നിലനിർത്തി. ഇത്തവണത്തെ ഐപിഎൽ താരലേലം ഡിസംബർ 19 നാണ്. അതിന് ഒരാഴ്ച മുമ്പ് വരെ ടീമുകൾക്ക് താരകൈമാറ്റം സാധ്യമാണ്. താരക്കൈമാറ്റവുമായി ബന്ധപ്പെട്ട് ഗുജറാത്ത് ടൈറ്റൻസും മുംബൈ ഇന്ത്യൻസുമായുള്ള കരാർ പിൻവലിച്ചതായാണ് റിപ്പോർട്ട്.
ഹാർദ്ദികിനായി മുംബൈ 15 കോടി രൂപ ഓഫർ ചെയ്‌തെന്നാണ് റിപ്പോർട്ടുകളിൽ പറഞ്ഞിരുന്നത്. ഐപിഎല്ലിലെ അരങ്ങേറ്റ സീസണിൽ തന്നെ ഗുജറാത്തിന് കീരിടം സമ്മാനിച്ച നായകനായിരുന്നു ഹാർദ്ദിക്. . 2023-ൽ ടൈറ്റൻസിനെ തുടർച്ചയായി രണ്ടാം തവണയും ഹാർദ്ദിക് ഫൈനലിലെത്തിച്ചു. പക്ഷേ സൂപ്പർ കിംഗ്‌സിനോട് ഫൈനലിൽ അടിയറവ് പറയേണ്ടി വന്നു. 2015 ൽ ഐപിഎല്ലിൽ അരങ്ങേറ്റം കുറിച്ച പാണ്ഡ്യ മുംബൈ ഇന്ത്യൻസിനായി ആറു സീസണുകളിൽ കളത്തിലിറങ്ങി. 2015, 2017, 2019, 2020 വർഷങ്ങളിൽ അദ്ദേഹം ഐപിഎല്ലിൽ മുംബൈയ്‌ക്കൊപ്പമുള്ള വിജയങ്ങളിലും പങ്കാളിയായി.
