ലോകേഷ് ചിത്രങ്ങളോട് തെന്നിന്ത്യൻ സിനിമാപ്രേമികൾക്ക് വല്ലാത്തൊരു ഇഷ്ടമാണ്. ലോകേഷിന്റെ ഒരോ സിനിമയും പ്രഖ്യാപിക്കുമ്പോൾ മുതൽ ആവേശത്തിലാണ് ആരാധകർ. ലോകേഷും സ്റ്റൈൽ മന്നൻ രജനികാന്തും ഒന്നിക്കുന്ന പുതിയ ചിത്രത്തിനും ആരാധകർ ഒന്നടങ്കം കാത്തിരിക്കുകയാണ്. തലൈവർ 171 എന്ന് താൽക്കാലികമായി പേരിട്ടിരിക്കുന്ന ചിത്രത്തിന്റെ ഔദ്യോഗിക പ്രഖ്യാപനം ഈ അടുത്താണ് നടന്നത്. ഇപ്പോഴിതാ ആരാധകരുടെ ആവേശം കൂട്ടുകയാണ് ചിത്രത്തിന്റെതായി പുറത്തുവന്ന വാർത്ത.
തലൈവർ 171-ൽ നടൻ ശിവകാർത്തികേയനും ഒരു കേന്ദ്ര കഥാപാത്രത്തെ അവതരിപ്പിക്കുമെന്നാണ് റിപ്പോർട്ട്. ഈ വാർത്ത തമിഴ് സിനിമാ മാദ്ധ്യമങ്ങൾ ശരിവക്കുകയും ചെയ്തിട്ടുണ്ട്. സൂപ്പർസ്റ്റാറിന്റെ കടുത്ത ആരാധകനാണ് ശിവകാർത്തികേയൻ. രജനികാന്തിന്റെ ഒപ്പം ശിവകാർത്തികേയന് ഒരുമിച്ച് അഭിനയിക്കണമെന്ന ഏറെ നാളത്തെ ആഗ്രഹം ഒടുവിൽ സഫലമായെന്നും മാദ്ധ്യമങ്ങൾ റിപ്പോർട്ട് ചെയ്യുന്നു.
രാഘവ ലോറൻസ്, പൃഥ്വിരാജ് സുകുമാരൻ, എന്നിവരെ കൂടാതെ മറ്റ് പാൻ ഇന്ത്യൻ താരങ്ങളും ചിത്രത്തിൽ എത്തുമെന്നാണ് റിപ്പോർട്ട്. ഇക്കാര്യങ്ങളുടെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് ആരാധകർ. അനിരുദ്ധാണ് ചിത്രത്തിന് സംഗീതം പകരുന്നത്. വൻ മുതൽ മുടക്കിൽ സൺ പിക്ചേഴ്സ് ആണ് ചിത്രം നിർമ്മിക്കുന്നത്. ചിത്രത്തിന്റെ പ്രീപ്രൊഡക്ഷൻ ജോലികൾ പുരോഗമിക്കുകയാണ്, 2024 ഏപ്രിലിൽ ഷൂട്ടിംഗ് ആരംഭിക്കുമെന്നാണ് റിപ്പോർട്ടുകൾ.