ധാരാളം അപ്ഡേറ്റുകളാണ് വാട്സ്ആപ്പിലേക്ക് മെറ്റ കൊണ്ടുവരുന്നത്. ഇപ്പോഴിതാ സന്ദേശമയക്കുന്നതിനായി ചാറ്റ് വിൻഡോ തുറക്കുമ്പോൾ പേരിനൊപ്പം തന്നെ അയാളുടെ പ്രൊഫൈൽ വിവരങ്ങളും നൽകാൻ ഒരുങ്ങുകയാണ് വാട്ട്സ്ആപ്പ്. ഇതിൽ സ്റ്റാറ്റസ് വിവരങ്ങളും ലാസ്റ്റ് സീനും ഉൾപ്പെടെ ഉണ്ടാകും. ചാറ്റ് വിൻഡോയിലുള്ള പേരിന് താഴെയായിരിക്കും ഈ ഫീച്ചർ ലഭ്യമാകുക എന്നാണ് വിവരം.
ആൻഡ്രോയിഡിലെ വാട്ട്സ്ആപ്പിന്റെ ഏറ്റവും പുതിയ ബീറ്റാ വേർഷനിലാണ് പുതിയ ഫീച്ചർ എത്തുന്നത്. സന്ദേശം അയക്കാനൊരുങ്ങുമ്പോൾ കോണ്ടാക്ടിന്റെ പേരിന് താഴെയായി ഓൺലൈനിലുണ്ടോ എന്ന് അറിയുന്നതിനായി ചാറ്റ് വിൻഡോയിലൂടെ മനസിലാക്കാനാകും. എന്നാൽ ആപ്പിന്റെ പ്രൈവസി സെറ്റിംഗ്സ് എനേബിൾ ചെയ്യുകയാണെങ്കിൽ മാത്രമാകും ഇത് സാധ്യമാകുക. നിലവിൽ ഈ ഫീച്ചർ വരുന്നതോടെ ആർക്കാണോ സന്ദേശം അയയ്ക്കുന്നത് അയാളുടെ പ്രൊഫൈലിലെത്തി അയാളെ എപ്പോഴാണ് അവസാനം കണ്ടതെന്ന് പരിശോധിക്കേണ്ടി വരില്ല.
ഇതിന് പുറമെ സ്റ്റാറ്റസ് മാറ്റിയോ എന്ന കാര്യത്തിലും ഒറ്റനോട്ടത്തിൽ തിരിച്ചറിയാനാകും. വാട്ട്സ്ആപ്പിന്റെ ആൻഡ്രോയിഡ് വേർഷൻ 2.23.25.11 ബീറ്റാ പതിപ്പിലാണ് പുതിയ ഫീച്ചറെത്തുന്നത്. നിലവിൽ സ്റ്റാറ്റസ് ബാറിലോ അല്ലെങ്കിൽ പ്രൊഫൈലിലോ മാത്രമാണ് സ്റ്റാറ്റസ് കാണാനാകുക. ഇതിന് മാറ്റമായാണ് ഇനി ചാറ്റ് വിൻഡോയിൽ സ്റ്റാറ്റസ് കാണാമെന്ന പുതിയ ഫീച്ചർ എത്തുന്നത്.
