അസീസ് നെടുമങ്ങാടിനോട് തന്നെ ഒരിക്കലും അനുകരിക്കരുതെന്ന് പറഞ്ഞിട്ടില്ലെന്ന് നടൻ അശോകൻ. കഴിഞ്ഞ ദിവസം അശോകനെ ഇനി വേദികളിൽ അവതരിപ്പിക്കില്ലെന്ന് അസീസ് പറഞ്ഞിരുന്നു. ഇതിനു പിന്നാലെയാണ് പ്രതികരണവുമായി അശോകൻ എത്തിയിരിക്കുന്നത്. അസീസ് നല്ല മിമിക്രി ആർട്ടിസ്റ്റാണ് എന്നാൽ തന്നെ അനുകരിക്കുന്നത് പലപ്പോഴും ഇഷ്ടപ്പെട്ടിട്ടില്ലെന്നാണ് പറഞ്ഞത്. പക്ഷേ തന്നെ ഒരിക്കലും അനുകരിക്കരുതെന്ന് പറഞ്ഞിട്ടില്ലെന്ന് അശോകൻ വ്യക്തമാക്കി.
അശോകന്റെ വാക്കുകളിലേക്ക്..
”അസീസിനോട് പ്രോഗ്രാം നിർത്താനോ എന്നെ അനുകരിക്കുന്നത് നിർത്താനോ ഞാൻ ആവശ്യപ്പെട്ടിട്ടില്ല. എന്നെ അനുകരിക്കുന്നതിനെ കുറിച്ചുള്ള കാര്യമാണ് പറഞ്ഞത്. അതിൽ വിവാദത്തിന്റെ ആവശ്യം ഉണ്ടെന്ന് തോന്നുന്നില്ല. വിവാദം ഉണ്ടായാലും എനിക്ക് ആ കാര്യത്തിൽ വിഷമമില്ല. അസീസ് നല്ലൊരു മിമിക്രി ആർട്ടിസ്റ്റ് തന്നെയാണ്. എന്നാൽ എന്നെ അനുകരിക്കുന്നത് പലപ്പോഴും എനിക്ക് ഇഷ്ടം തോന്നിയിട്ടില്ല. ഞാൻ എന്റെ വ്യക്തിപരമായ കാര്യം മാത്രമാണ് പറഞ്ഞത്.”- അശോകൻ പറഞ്ഞു.
കഴിഞ്ഞ ദിവസം അശോകനുമായുള്ള അഭിമുഖത്തിനിടെയാണ് അസീസ് നെടുമങ്ങാടിനെ പരാമർശിച്ചത്. അസീസ് നല്ല രീതിയിൽ അശോകനെ അനുകരിക്കാറുണ്ടെന്ന അവതാരികയുടെ പ്രസ്താവനയോട് തനിക്ക് അങ്ങനെ തോന്നിയില്ലെന്നായിരുന്നു അശോകൻ പറഞ്ഞത്. തൊട്ടു പിന്നാലെ ഇനി അശോകനെ അനുകരിക്കില്ലെന്ന് പറഞ്ഞ് അസീസ് രംഗത്തെത്തുകയായിരുന്നു.
