തെലങ്കാനയിൽ നിയമസഭാ തിരഞ്ഞെടുപ്പ് പുരോഗമിക്കുകയാണ്. രാവിലെ 7 മണിയോടെ തന്നെ എല്ലാ ബൂത്തുകളിലും വോട്ടെടുപ്പ് ആരംഭിച്ചു. തെലങ്കാനയിലെ നിയമസഭാ തെരഞ്ഞെടുപ്പിൽ തെലുങ്ക് സിനിമാ മേഖലയിൽ നിന്നുള്ള നിരവധി താരങ്ങൾ ഇതിനകം വോട്ടവകാശം വിനിയോഗിച്ചു കഴിഞ്ഞു.
രാവിലെ തന്നെ ബൂത്തിലെത്തിയ അല്ലു അർജ്ജുൻ മറ്റ് വോട്ടർമാർക്കൊപ്പം കാത്തുനിന്ന ശേഷമാണ് വോട്ട് ചെയ്തത്. ഹൈദരാബാദിലെ ജൂബിലി ഹിൽസ് സ്കൂളിലാണ് താരം വോട്ട് ചെയ്തത്. ‘നിങ്ങൾ ഓരോരുത്തരോടും ഉത്തരവാദിത്തത്തോടെ വോട്ട് ചെയ്യാൻ ഞാൻ അഭ്യർത്ഥിക്കുന്നു, എന്ന് അദ്ദേഹം മാദ്ധ്യമങ്ങളോട് പറഞ്ഞു. താൻ സമ്മതിദാനം നിർവ്വഹിച്ചു എന്ന് അറിയിച്ചുകൊണ്ടുള്ള ചിത്രങ്ങൾ താരം സോഷ്യൽ മീഡിയയിലും പങ്കുവെച്ചു.
അല്ലു അർജ്ജുനെ കൂടാതെ സൂപ്പർസ്റ്റാർ ചിരഞ്ജീവി, ജൂനിയർ എൻടിആർ, തുടങ്ങിയവരും ജൂബിലി ഹിൽസിലെ പോളിംഗ് ബൂത്തിൽ തന്നെയാണ് വോട്ട് ചെയ്യാൻ എത്തിയത്.
ജൂനിയർ എൻടിആർ കുടുംബത്തോടൊപ്പം ജൂബിലി ഹിൽസിലെ ഒബുൾ റെഡ്ഡി സ്കൂളിലെ 150-ാം നമ്പർ ബൂത്തിലാണ് വോട്ടവകാശം വിനിയോഗിച്ചത്.
നടൻ വിക്ടറി വെങ്കിടേഷും സമ്മതിദാനാവകാശം വിനിയോഗിച്ചു. മണികൊണ്ട ഹൈസ്കൂളിൽ സജ്ജീകരിച്ച പോളിംഗ് സ്റ്റേഷനിലാണ് അദ്ദേഹം വോട്ട് രേഖപ്പെടുത്തിയത്.
സംവിധായകൻ തേജയും ഇതേ പോളിംഗ് സ്റ്റേഷനിൽ തന്നെ വോട്ടവകാശം വിനിയോഗിച്ചു. ഇവർക്കൊപ്പം മറ്റ് ചില താരങ്ങളും മണികൊണ്ടയിൽ വോട്ട് ചെയ്തിരുന്നു.
