തെന്നിന്ത്യൻ സ്റ്റൈലിഷ് സ്റ്റാർ അല്ലു അർജ്ജുന്റെ കരിയറിനെതന്നെ മാറ്റി മറിച്ച സിനിമയാണ് പുഷ്പ. ചിത്രത്തിലൂടെ താരത്തിന് പാൻ- ഇന്ത്യൻ സറ്റാറാവാനും മികച്ച നടനുള്ള ദേശീയ പുരസ്കാരം സ്വന്തമാക്കാനും സാധിച്ചിരുന്നു. ഇതിനു പിന്നാലെയാണ് പുഷ്പ 2-ന്റെ ചിത്രീകരണങ്ങൾ തുടങ്ങിയത്. ചിത്രീകരണത്തിന്റെ പല വീഡിയോകളും ആരാധകർക്കായി അല്ലു അർജ്ജുൻ തന്നെ പങ്കുവച്ചിട്ടുണ്ടായിരുന്നു. സിനിമയുടെ ചിത്രീകരണം പുരോഗമിക്കുന്നതിനിടെയാണ് ആരാധകരെ നിരാശപ്പെടുത്തുന്ന വാർത്തകൾ ഇപ്പോൾ പുറത്തുവരുന്നത്.
പുഷ്പ 2-ന്റെ ചിത്രീകരണം തത്കാലത്തേക്ക് മാറ്റി വച്ചിരിക്കുകയാണെന്ന വാർത്തയാണ് ആരാധകരെ തേടി എത്തിയിരിക്കുന്നത്. ചിത്രത്തിന്റെ ഫസ്റ്റ്ലുക്ക് പോസ്റ്ററിലുള്ള അല്ലുവിന്റെ ജാതര മേക്ക് ഓവറിലാണ് ഹൈദരാബാദിലെ രാമോജി ഫിലിംസിറ്റിയിൽ ഷൂട്ടിംഗ് നടന്നിരുന്നത്. ആ വേഷത്തിൽ അല്ലുവിന് ഒരു ഗാന രംഗവും സംഘട്ടന രംഗങ്ങളുമാണുണ്ടായിരുന്നത്. എന്നാൽ ഭാരമേറിയ വേഷം ധരിച്ച് തുടർച്ചയായി അഭിനയിച്ചതിനാൽ അദ്ദേഹത്തിന് ദേഹാസ്വാസ്ഥ്യം അനുഭവപ്പെടുകയായിരുന്നു. ശരീര വേദനയെ തുടർന്ന് അല്ലുവിന് ചിത്രത്തിൽ നിന്നും കുറച്ച് നാളത്തേക്ക് വിട്ടു നിൽക്കേണ്ടി വന്നതായുള്ള റിപ്പോർട്ടുകളാണ് പുറത്തു വരുന്നത്. താരത്തിന്റെ ശരീര വേദന മാറുന്നത് വരെ ചിത്രീകരണം നിർത്തി വച്ചിരിക്കുകയാണ്. എന്നാൽ ശരീര വേദന അവഗണിച്ചും അല്ലു അർജ്ജുൻ അഭിനയിക്കാൻ സന്നദ്ധത കാണിച്ചെങ്കിലും സംവിധായകൻ സുകുമാർ താരത്തിന് വിശ്രമം അനുവദിക്കുകയായിരുന്നു. താരത്തിന്റെ ആരോഗ്യം മെച്ചപ്പെടുമ്പോൾ ചിത്രീകരണം പുനരാരംഭിക്കുമെന്നാണ് വിവരം.
തെലുങ്ക്, ഹിന്ദി, മലയാളം, തമിഴ്, കന്നഡ എന്നീ ഭാഷകളിലാണ് പുഷ്പ-2 പുറത്തിറങ്ങുന്നത്. ചന്ദനക്കടത്തുക്കാരനായ പുഷ്പരാജയായിട്ടാണ് അല്ലു ചിത്രത്തിൽ വേഷമണിയുന്നത്. പ്രതിനായകനായി എത്തുന്നത് മലയാളത്തിന്റെ സ്വന്തം ഫഹദ് ഫാസിലാണ്. രശ്മിക മന്ദാനയാണ് ചിത്രത്തിൽ നായിക. അടുത്ത വർഷം ഓഗസ്റ്റ് 15-ന് പുഷ്പ ദിറൂൾ തിയേറ്ററുകളെ പൂരപ്പറമ്പാക്കാൻ എത്തുമെന്നാണ് ആരാധകർ പ്രതീക്ഷിക്കുന്നത്.
