പാകിസ്താനെതിരെ നടക്കുന്ന പരമ്പരയോടെ ടെസ്റ്റില്‍ നിന്ന് വിരമിക്കുമെന്ന് പ്രഖ്യാപിച്ച ഡേവിഡ് വാര്‍ണറിനെതിരെ തുറന്നടിച്ച് മുന്‍ സഹതാരം. രാജ്യത്തെ വഞ്ചിച്ച അവന് ഹീറോ പരിവേഷം നല്‍കേണ്ടതില്ലെന്ന് മിച്ചല്‍ ജോണ്‍സണ്‍ തുറന്നടിച്ചു. എങ്ങനെയാണ് പാടുപെടുന്ന ഒരു ടെസ്റ്റ് ഓപ്പണര്‍ക്ക് സ്വന്തം വിരമിക്കല്‍ തീയതിയും മത്സരവും തീരുമാനിക്കാനാവുക. അയാള്‍ ഓസ്‌ട്രേലിയയുടെ ക്യപ്റ്റനല്ല, അയാള്‍ക്ക് ഓസ്‌ട്രേലിയയെ നയിക്കാനുമാകാത്ത വിധം വിലക്കുമുണ്ട് ജോണ്‍സണ്‍ പറയുന്നു. സിഡ്‌നിയിലാണ് വാര്‍ണറിന്റെ അവസാന ടെസ്റ്റ് മത്സരം ക്രിക്കറ്റ് ഓസ്്‌ട്രേലിയ ഒരുക്കിയിരിക്കുന്നത്.
‘നമ്മള്‍ ഡേവിഡ് വാര്‍ണറുടെ ടെസ്റ്റ് വിരമിക്കല്‍ സീരിസിനായി തയ്യാറെടുക്കുകയാണ്. എന്തിനാണ് വാര്‍ണര്‍ക്ക് ഇത്ര ഗംഭീരമായ യാത്രയപ്പ് എന്ന് ആരെങ്കിലും പറഞ്ഞുതരണം. ടെസ്റ്റില്‍ കഷ്ടപ്പെടുന്ന ഓപ്പണര്‍ എന്തിന് സ്വന്തം വിരമിക്കല്‍ തീയതി പ്രഖ്യാപിക്കണം. ഓസ്‌ട്രേലിയന്‍ ക്രിക്കറ്റ് ചരിത്രത്തിലെ ഏറ്റവും വലിയ തട്ടിപ്പുകളിലൊന്നിലെ പ്രധാനിക്ക് എന്തിന് ഹീറോയുടെ പരിവേഷത്തോടെ യാത്രയപ്പ് നല്‍കണം’ അയാള്‍ ഓസ്‌ട്രേലിയയുടെ ടെസ്റ്റ് ക്യാപ്റ്റനല്ല, അതിനയാള്‍ ഒരിക്കലും അര്‍ഹനുമല്ല. കരിയറില്‍ ഇനി അയാള്‍ക്ക് ക്യാപാറ്റനാകാനുമാകില്ല.-മിച്ചല്‍ ജോണ്‍സണ്‍ പറഞ്ഞു. 2009 മുതല്‍ 2015 വരെ വാര്‍ണറിന്റെ സഹതാരമായി ജോണ്‍സണ്‍.
2018-ലെ കുപ്രസിദ്ധമായ പന്ത് ചുരണ്ടല്‍ വിവാദത്തിലെ വാര്‍ണറുടെ പങ്ക് ചൂണ്ടിക്കാട്ടിയാണ് ജോണ്‍സന്റെ രൂക്ഷ വിമര്‍ശനം. പന്ത് ചുരണ്ടല്‍ വിവാദത്തില്‍ ഡേവിഡ് വാര്‍ണറെ ക്രിക്കറ്റ് ഓസ്‌ട്രേലിയ 12 മാസത്തേക്ക് വിലക്കിയിരുന്നു. വാര്‍ണര്‍ക്കൊപ്പം സ്മിത്തിനും കാമറൂണ്‍ ബാന്‍ക്രോഫ്റ്റിനും വിലക്ക് ലഭിച്ചിരുന്നു. പെര്‍ത്തില്‍ ഡിസംബര്‍ 14ന് ആദ്യ ടെസ്റ്റും മെല്‍ബണില്‍ ഡിസംബര്‍ 26ന് രണ്ടാം മത്സരവും സിഡ്നിയില്‍ 2024 ജനുവരി 3ന് അവസാന ടെസ്റ്റും തുടങ്ങും. സിഡ്‌നിയിലെ മത്സരത്തോടെ വാര്‍ണര്‍ ടെസ്റ്റില്‍ നിന്ന് വിരമിക്കാനാണ് സാധ്യത. ടെസ്റ്റില്‍ 109 കളികളില്‍ 25 സെഞ്ചുറികളോടെ 44.43 ശരാശരിയില്‍ 8,487 റണ്‍സാണ് വാര്‍ണര്‍ നേടിയിട്ടുള്ളത്.
