എണ്ണമറ്റ ഇനം മൃഗങ്ങളുടെ ആവാസ കേന്ദ്രമാണ് ഭൂമി. അതിൽ പലതിനും വംശനാശം സംഭവിച്ചു കഴിഞ്ഞു. ഒരു കാലത്ത് ഭൂമിയിൽ വിഹരിച്ചിരുന്ന മൃഗങ്ങളെപ്പറ്റി അറിഞ്ഞാൽ നാം ഭയന്നു വിറച്ചുപോകും. ഭീമാകാരമായ മൃഗങ്ങൾ ഈ ഭൂമിയിൽ ജീവിച്ചിരുന്നു എന്നത് അത്ഭുതത്തോടും ഭയത്തോടും കൂടിയാണ് നാം കേട്ടിട്ടുള്ളത്. ഭൂമിയിൽ വിഹരിച്ചിട്ടുള്ളതിൽ വച്ച് ഏറ്റവും അപകടകരമായ വംശനാശം സംഭവിച്ച മൃഗങ്ങളെപ്പറ്റി നിങ്ങൾക്കറിയണോ? ചരിത്രാതീത സ്രാവുകൾ മുതൽ കൂറ്റൻ ദിനോസറുകൾ വരെ ഇവയിൽപെടും. ഒരു കാലത്ത് ഭൂമിയിൽ ജീവിച്ചിരുന്ന ചില ഭീമാകാരരായ മൃഗങ്ങളെയാണ് ഇവിടെ പരിചയപ്പെടുത്തുന്നത്.
1. മെഗലോഡൺ
മെഗ്, ഒരു ഭീമാകാരമായ ചരിത്രാതീത സ്രാവായിരുന്നു. ഭൂമിയിൽ ഇതുവരെ ജീവിച്ചിരുന്നിട്ടുള്ളതിൽ വച്ച് ഏറ്റവും ക്രൂരമായ മൃങ്ങളിൽ ഒന്ന്. 60 അടി വരെ നീളവും 50 ടണ്ണിലധികം ഭാരവുമുള്ള മെഗലോഡൺ, സമുദ്രത്തിൽ വസിച്ചിരുന്ന ഏറ്റവും വലിയ ജീവികളിൽ ഒന്നാണ്. മയോസീൻ, പ്ലിയോസീൻ കാലഘട്ടങ്ങളിൽ, മെഗലോഡൺ കടലിലെ ഒരു പിശാചായിരുന്നു. തിമിംഗലങ്ങൾ, ഡോൾഫിനുകൾ, സീലുകൾ എന്നിങ്ങനെ എല്ലാ സമുദ്രജീവികളെയും ഇവ വേട്ടയാടി. 3.6 ദശലക്ഷം വർഷങ്ങൾക്ക് മുമ്പാണ് മെഗലോഡണിന് വംശനാശം സംഭവിച്ചത്.
2. ടൈറനോസോറസ് റെക്സ്
ടി-റെക്സ് എന്നറിയപ്പെടുന്ന ടൈറനോസോറസ് റെക്സ്, ക്രിറ്റേഷ്യസ് കാലഘട്ടത്തിന്റെ അവസാനത്തിൽ ജീവിച്ചിരുന്ന ഏറ്റവും വലുതും മാരകവുമായ മാംസഭോജിയായ ദിനോസറുകളിൽ ഒന്നാണ്. 6.8 മെട്രിക് ടൺ വരെ ഭാരവും 12 മീറ്റർ വരെ നീളവും ഇവയ്ക്ക് ഉണ്ടായിരുന്നു. ടി- റെക്സിന് അസാധ്യ വേഗതയുണ്ടായിരുന്നു. അവയുടെ ഒരു ചെറിയ കടി പോലും എല്ലുകളെ തകർക്കാൻ കഴിയുന്നത്രയും ശക്തിയുള്ളതാണ്. വലിപ്പം, വേഗത, ശക്തി എന്നിവ ഇവയെ കരയിലെ ഏറ്റവും വലിയ വേട്ടക്കാരനാക്കി. ഈ കൂറ്റൻ ദിനോസറിന് 65 ദശലക്ഷം വർഷങ്ങൾക്ക് മുമ്പ് വംശനാശം സംഭവിച്ചു.
3. സ്മിലോഡൺ
പ്ലീസ്റ്റോസീൻ കാലഘട്ടത്തിൽ വടക്കേ അമേരിക്കയിലും തെക്കേ അമേരിക്കയിലും കണ്ടിരുന്ന ഒരു വലിയ കടുവയായിരുന്നു സാബർ-പല്ലുള്ള സ്മിലോഡൺ. കുതിരകൾ, കാട്ടുപോത്ത്, മാമോത്തുകൾ തുടങ്ങിയ വലിയ ഇരകളെ കീഴ്പ്പെടുത്താൻ കഴിയുന്ന തരത്തിലുള്ള നീളമുള്ള പല്ലും ശക്തമായ താടിയെല്ലും ഇവയ്ക്ക് ഉണ്ടായിരുന്നു. വംശനാശം സംഭവിച്ച ഏറ്റവും പ്രശസ്തമായ സസ്തനികളിൽ ഒന്നാണിത്. വലിപ്പവും ഉഗ്രമായ വേട്ടയാടൽ ശൈലിയും സ്മിലോഡണിനെ അക്കാലത്തെ ഏറ്റവും അപകടകരമായ വേട്ടക്കാരിൽ ഒന്നാക്കി മാറ്റി. ഏകദേശം 10,000 വർഷങ്ങൾക്ക് മുമ്പ് ഈ മൃഗം വംശനാശം സംഭവിച്ചു.
4. ടെററ്റോണിസ്
20 അടി വരെ നീളമുള്ള ചിറകുകള്ള ഒരു ഭീമൻ ഇരപിടിയൻ പക്ഷിയായിരുന്നു ടെററ്റോണിസ്. പ്ലീസ്റ്റോസീൻ കാലഘട്ടത്തിൽ അമേരിക്കയിൽ കണ്ടെത്തിയ ഈ കൂറ്റൻ ഏവിയൻ ജീവി ശ്രദ്ധേയമായ ഒരു കാഴ്ചയായിരുന്നു, അതിന്റെ ഭീമാകാരമായ ചിറകുകൾ കൊണ്ട് വലിയ സസ്തനികളെ വേട്ടയാടാൻ ഇതിന് കഴിയുമായിരുന്നു. ഏകദേശം 10,000 വർഷങ്ങൾക്ക് മുമ്പ്, പ്ലീസ്റ്റോസീൻ യുഗത്തിന്റെ അവസാനത്തിൽ, കൂറ്റൻ പക്ഷിക്ക് വംശനാശം സംഭവിച്ചു.
5. ക്വെറ്റ്സാൽകോട്ട്ലസ്
അവസാന ക്രിറ്റേഷ്യസ് കാലഘട്ടത്തിൽ ജീവിച്ചിരുന്ന ഒരു വലിയ ടെറോസറായിരുന്നു ക്വെറ്റ്സാൽകോട്ട്ലസ്. പല്ലില്ലാത്ത ടെറോസറുകൾക്ക് അസാധാരണമാംവിധം നീളവും കടുപ്പമുള്ള കഴുത്ത് ഉണ്ടായിരുന്നു. ഈ ടെറോസോർ പറക്കുന്ന മൃഗങ്ങളിൽ ഏറ്റവും വലുതാണെന്ന് കരുതപ്പെടുന്നു. അതിന്റെ ചിറകുകൾക്ക് 10-11 മീറ്റർ വീതിയുണ്ടായിരുന്നു. ഏകദേശം 65 ദശലക്ഷം വർഷങ്ങൾക്ക് മുമ്പ് ഈ മൃഗത്തിന് വംശനാശം സംഭവിച്ചു.
