ചെന്നൈ: മിഷോങ് ചുഴലിക്കാറ്റിനെ തുടർന്ന് ചെന്നൈ നഗരം പ്രളയക്കയത്തിലാണ്. സാധാരണക്കാരായ ജനങ്ങൾ അനുഭവിക്കുന്ന ദുരിതങ്ങൾ പറഞ്ഞറിയിക്കുന്നതിനും അപ്പുറമാണ്. ഇപ്പോഴിതാ ഇന്ത്യൻ ക്രിക്കറ്റ് താരം അശ്വിനാണ് താൻ താമസിക്കുന്ന പ്രദേശത്തിന്റെ നിലവിലെ അവസ്ഥ പങ്കുവച്ചിരിക്കുന്നത്. സമൂഹമാദ്ധ്യമമായ എക്സിലൂടെയാണ് താരം ഇക്കാര്യം പങ്കുവച്ചിരിക്കുന്നത്.
30 മണിക്കൂറിലധികമായി ഞാൻ താമസിക്കുന്ന പ്രദേശത്ത് വൈദ്യുതിയില്ല. ഇവിടെ മാത്രമല്ല മിക്ക സ്ഥലങ്ങളിലും സമാന സാഹചര്യമാണുള്ളത്. എന്താണ് ചെയ്യേണ്ടതെന്ന് അറിയില്ല. കൃത്യമായി ഭക്ഷണം ലഭിക്കുന്നുണ്ട്- അശ്വിൻ എക്സിൽ കുറിച്ചു. ചിത്രങ്ങളും വീഡിയോയും താരം പോസ്റ്റ് ചെയ്തിട്ടുണ്ട്.
പ്രളയത്തെ തുടർന്ന് നിരവധി പേരാണ് പുറത്തിറങ്ങാൻ കഴിയാതെ ബുദ്ധിമുട്ടിലായിരിക്കുന്നത്. പ്രളയത്തിൽ കുടുങ്ങിയ ബോളിവുഡ് നടൻ ആമിർ ഖാൻ ഉൾപ്പെടെയുള്ളവരെ ഫയർഫോഴ്സ് രക്ഷപ്പെടുത്തിയിരുന്നു.
