ഇന്ന് യുപിഐ മുഖേന ഇടപാടുകൾ നടത്താത്തവർ ചുരുക്കമായിരിക്കാം. വേഗത്തിൽ പണമിടപാടുകൾ പൂർത്തിയാക്കുന്നതിനായി യുപിഐ സൗകര്യവും മൊബൈൽ ബാങ്കിംഗും ഒരുമിച്ച് നടത്താനാകുന്ന ആപ്പ് ആണെങ്കിൽ ഉപയോക്താക്കൾ സംതൃപ്തരായിരിക്കും. ഇപ്പോഴിതാ ഇത്തരത്തിൽ ഉപയോക്താക്കൾക്ക് ഉപകാരപ്രദമാകും വിധത്തിൽ യൂണിയൻ ബാങ്ക് പുതിയ ആപ്ലിക്കേഷൻ അവതരിപ്പിച്ചിരിക്കുകയാണ്. ഇടപാടുകൾ വേഗത്തിൽ പൂർത്തിയാക്കുന്നതിനായി യൂണിയൻ ബാങ്ക് ഓഫ് ഇന്ത്യ വ്യോം കണ്ടെയ്നർ എന്ന ആപ്ലിക്കേഷനാണ് അവതരിപ്പിച്ചിരിക്കുന്നത്. മൊബൈൽ ബാങ്കിംഗും യുപിഐ ഇടപാടുകളും സുരക്ഷിതമായി ഇതിലൂടെ നടത്താനാകും.
വ്യോം ആപ്ലിക്കേഷൻ ഗൂഗിൾ പ്ലേ സ്റ്റോറിലും ആപ്പിൾ ആപ്പ് സ്റ്റോറിലും ലഭ്യമാണ്. ആവശ്യമുള്ള സേവനങ്ങൾക്കായി ഉപയോക്താക്കൾ ആപ്പിൽ രജിസ്ട്രേഷൻ പൂർത്തിയാക്കേണ്ടതുണ്ട്. ആപ്പിലെ ഭിം യുപിഐ ഐക്കോണിൽ ആദ്യമായി ക്ലിക്ക് ചെയ്യുമ്പോൾ ഉപയോക്താക്കളോട് ഒരു യുപിഐ ഐടി തയാറാക്കേണ്ടതുണ്ടോ എന്ന് ചോദിക്കും. ഇത് അംഗീകരിക്കുന്നതോടെ ഉപയോക്താക്കൾക്ക് യുപിഐ ഐഡി ക്രിയേറ്റ് ചെയ്യാവുന്നതാണ്. അക്കങ്ങളും അക്ഷരങ്ങളും അടങ്ങിയ ആദ്യ ഭാഗത്തിന് ശേഷം @unionbankofindia, @uboi, @unionbank എന്നിങ്ങനെയുള്ള ഹാൻഡിലുകളാകും ഉണ്ടാകുക. ഇതിനൊപ്പം തന്നെ ഏതാണ് ബാങ്കെന്ന് തിരഞ്ഞെടുത്ത് യുപിഐ ഐഡിയുമായി ബന്ധിപ്പിക്കണം.
സേവിംഗ്സ് അക്കൗണ്ടുകൾക്ക് പുറമെ കറണ്ട് അക്കൗണ്ടുകളും ഓവർഡ്രാഫ്റ്റ് അക്കൗണ്ടുകളുമെല്ലാം യുപിഐ ഐഡിയുമായി ബന്ധിപ്പിക്കാവുന്നതാണ്. എന്നാൽ ബാങ്ക് അക്കൗണ്ടുകൾ ആക്ടീവ് ആയിരിക്കണമെന്നു മാത്രം. പണമിടപാടുകൾ നടത്തുന്നതിന് പുറമെ ഇതിലൂടെ മറ്റുള്ളവരിൽ നിന്നും പണം സ്വീകരിക്കുകയും ബാലൻസ് നോക്കുകയും ചെയ്യാനാകും. യുപിഐ മുഖേന നൽകാൻ സാധിക്കുന്ന പണത്തിന് പരിധി നിശ്ചയിക്കാനുള്ള സംവിധാനവും ഇതിലുണ്ട്. പരമാവധി ഒരു ലക്ഷം രൂപ വരെ ഇത്തരത്തിൽ പരിധി നിശ്ചയിക്കാവുന്നതാണ്.
