ആരോഗ്യമുള്ള കരുത്തുറ്റ തലമുടി എല്ലാവരുടെയും ആഗ്രഹമായിരിക്കും. അതിനായി പല തരത്തിലുള്ള പരീക്ഷണങ്ങൾ ചെയ്യുന്നവരും കുറവല്ല. ഹോർമോൺ വ്യത്യാസം, ജനിതക രോഗം, ജീവിതശൈലി എന്നിങ്ങനെ പല പ്രശ്നങ്ങളും മുടിയുടെ ആരോഗ്യത്തെ ബാധിക്കാം. എന്നാൽ ശരിയായ ഭക്ഷണക്രമം ആരോഗ്യമുള്ള മുടി വളരുന്നതിന് സഹായിക്കും. അതിനായി അത്യാവശ്യമായ ഒന്നാണ് ബി വിറ്റാമിനുകൾ.
സാധാരണയായി എട്ട് തരം ബി വിറ്റാമിനുകളാണ് ഉള്ളത്. അതിൽ ബയോട്ടിൻ (ബി7), ഫോളേറ്റ് (ബി9), വിറ്റാമിൻ ബി 12 എന്നിവയാണ് മുടിയുടെ ആരോഗ്യത്തിന് പ്രധാനപ്പെട്ടത്. ഇവ അടങ്ങിയിട്ടുള്ള ഭക്ഷണങ്ങൾ കഴിക്കുന്നത് വഴി മുടിയുടെ ആരോഗ്യപ്രശ്നങ്ങൾ തടയാൻ സഹായകമാവും.
കാത്സ്യവും പ്രോട്ടീനും ധാരാളം അടങ്ങിയിട്ടുള്ളവയാണ് പാലുത്പന്നങ്ങൾ. കൂടാതെ തൈര്, ചീസ് എന്നിവയിൽ ബയോട്ടിനും അടങ്ങിയിട്ടുണ്ട്. ഇവ ദിവസവും ഭക്ഷണത്തിൽ ഉൾപ്പെടുത്തുന്നത് വഴി കരുത്തുറ്റ മുടിയിഴകൾ സ്വന്തമാക്കാനാവും. അതോടൊപ്പം തന്നെ ഉൾപ്പെടുത്തേണ്ട ഒന്നാണ് ഇലക്കറികൾ. ഒട്ടുമിക്ക ഇലക്കറികളിലും ഫോളേറ്റ് അടങ്ങിയിട്ടുണ്ട്. ഇവ മുടിയുടെ ആരോഗ്യം നിലനിർത്തുന്നതിന് സഹായിക്കുന്ന പ്രധാന പോഷകമാണ്.
മുട്ട, മത്സ്യം എന്നിവ് മുടിയുടെ ആരോഗ്യം വർധിപ്പിക്കുന്നതിൽ പ്രധാന പങ്ക് വഹിക്കുന്നുണ്ട്. മുട്ടയിൽ അടങ്ങിയിട്ടുള്ള ബി 5 മുടിക്ക് കൂടുതൽ ബലം നൽകുന്നു. ചുവന്ന രക്താണുക്കൾ ഉത്പാദിപ്പിക്കാനും ഇത് സഹായിക്കും. ഇത് മുടിയുടെ വേരുകൾക്ക് ഓക്സിജൻ നൽകാൻ സഹായകമാണ്. ഒമേഗ 3 ഫാറ്റി ആസിഡുകൾ ഉയർന്ന അളവിൽ ഉൾപ്പെട്ടിട്ടുള്ളതാണ് മത്സ്യം. കൂടാതെ വിറ്റാമിൻ ബി 3, വിറ്റാമിൻ ബി 6, വിറ്റാമിൻ ബി 12 എന്നിവയും ഇതിൽ അടങ്ങിയിട്ടുണ്ട്. ഇവയെല്ലാം മുടിയുടെ ആരോഗ്യത്തെ സംരക്ഷിക്കാൻ സഹായിക്കും.
വിറ്റാമിൻ ബി 1 ന്റെ(തയാമിൻ) കലവറയാണ് നട്സും സീഡ്സും. ഇത് നാഡീവ്യവസ്ഥയുടെ പ്രവർത്തനത്തെ പ്രോത്സാഹിപ്പിക്കുകയും ഭക്ഷണങ്ങളിൽ നിന്നുള്ള പോഷകങ്ങളെ ഊർജമാക്കി മാറ്റുകയും ചെയ്യും. ഈ ഊർജ്ജം മുടി കോശങ്ങളെ ആരോഗ്യകരമായി വളരാൻ സഹായിക്കും.
അതോടൊപ്പം വിറ്റാമിൻ ബി 2 (റൈബോഫ്ലേവിൻ), വിറ്റാമിൻ ബി 3 (നിയാസിൻ) എന്നിവ അടങ്ങിയിട്ടുള്ള പഴമാണ് അവക്കാഡോ. ഇത് മുടിയുടെ നീളവും കരുത്തും വർദ്ധിപ്പിക്കാൻ സഹായിക്കും. ഗോതമ്പ്, ഓട്സ്, ബാർലി, ധാന്യങ്ങൾ, മില്ലറ്റ് എന്നിവ പോലുള്ള മുഴുവൻ ധാന്യങ്ങളും വിറ്റാമിൻ ബി 1, ബി 2, ബി 3, ബി 5 എന്നിവ ഉൾപ്പെടുന്നുണ്ട്. ദിവസേനെയുള്ള ഭക്ഷണത്തിൽ ഇത് ഉൾപ്പെടുത്തും വഴി കരുത്തുറ്റ ആരോഗ്യകരമായ മുടി സ്വന്തമാക്കാൻ കഴിയും.
