ദഹന വ്യവസ്ഥയുടെ മൊത്തത്തിലുള്ള ആരോഗ്യത്തിൽ പ്രധാന പങ്ക് വഹിക്കുന്ന അവയവമാണ് കുടൽ. ആരോഗ്യകരമായ കുടൽ ശാരീരികവും മാനസികവുമായ ആരോഗ്യത്തിന് അത്യന്താപേക്ഷിതമാണ്.
ശരീരത്തിന്റെ രണ്ടാമത്തെ മസ്തിഷ്കമാണ് ആമാശയം എന്നാണ് പറയുന്നത്. കുടലിനും അത്രത്തോളം പ്രാധാന്യമാണുള്ളത്. ഭക്ഷണത്തെ ചെറിയ തന്മാത്രകളാക്കി മാറ്റുന്നതിനും കാർബോ ഹൈഡ്രേറ്റ്, പ്രോട്ടീൻ, കൊഴുപ്പ്, വിറ്റാമിനുകൾ, ധാതുക്കൾ തുടങ്ങിയ പോഷകങ്ങൾ ആഗിരണം ചെയ്യുന്നതും മാലിന്യങ്ങൾ നീക്കുന്നതും കുടലിന്റെ പ്രവർത്തനമാണ്.
ദഹന വ്യവസ്ഥയിൽ പ്രധാന പങ്ക് വഹിക്കുന്ന കുടലിനെ സംരക്ഷിക്കാൻ ഓരോരുത്തരും ബാധ്യസ്ഥരാണ്. അനാരോഗ്യമായ കുടൽ മറ്റ് ശരീരഭാഗങ്ങളെ പ്രതികൂലമായി ബാധിച്ചേക്കാമെന്ന് വിദഗ്ധർ അഭിപ്രായപ്പെടുന്നു. കുടലിന്റെ ആരോഗ്യം സംരക്ഷിക്കുന്നതിനായി ഇക്കാര്യങ്ങൾ ശ്രദ്ധിക്കാം..
1) പ്രോബയോട്ടിക് ഭക്ഷണക്രമം
പ്രേബയോട്ടിക് ആഹാരം ശീലമാക്കുന്നത് കുടലിന്റെ ആരോഗ്യത്തിന് നല്ലതാണ്. കുടലിലെ നല്ല ബാക്ടീരിയകളുടെ പ്രവർത്തനത്തെ പരിപോഷിപ്പിക്കാൻ പ്രോബയോട്ടിക് ആഹാരത്തിന് കഴിയും. തൈര്, അച്ചാർ,പഴങ്കഞ്ഞി, പുളിപ്പിച്ച ആഹാരം എന്നിവ കഴിക്കുന്നത് നല്ലതാണ്.
2) സമീകൃതാഹാരം ശീലമാക്കുക
നാരുകൾ, പഴങ്ങൾ, പച്ചക്കറികൾ, ധാന്യങ്ങൾ, ആരോഗ്യകരമായ കൊഴുപ്പുകൾ എന്നിവയടങ്ങിയ ഭക്ഷണം കഴിക്കുന്നത് കുടലിന്റെ ആരോഗ്യത്തിന് നല്ലതാണ്. ക്രമമായ മലവിസർജനത്തിനും കുടലിലെ നല്ല ബാക്ടീരിയകളുടെ വളർച്ചയ്ക്കും ദഹന ആരോഗ്യത്തിന് ആവശ്യമായ പോഷകങ്ങൾ നൽകുന്നതിനും സഹായിക്കും.
3) ജലാംശം നിലനിർത്തുക
ആവശ്യത്തിന് വെള്ളം കുടിക്കാൻ ശ്രദ്ധിക്കണം. ഇത് ശരീരത്തിലെ ജലാംശം നിലനിർത്താൻ സഹായിക്കുന്നു . ശരീരത്തിന്റെ മൊത്തത്തിലുള്ള ആരോഗ്യത്തെ ഇത് മെച്ചപ്പെടുത്തുന്നു.
4) സംസ്കരിച്ച ഭക്ഷണം പരിമിതപ്പെടുത്തുക
കുടലിന്റെ ആരോഗ്യത്തെ പ്രതികൂലമായി ബാധിക്കുന്ന അഡിറ്റീവുകൾ, നിറങ്ങൾ, പ്രിസർവേറ്റീവുകൾ എന്നിവ അടങ്ങിയിട്ടുള്ള സംസ്കരിച്ച ഭക്ഷണം ശീലമാക്കുന്നത് കുടലിന്റെ ആരോഗ്യത്തെയും ദഹന വ്യവസ്ഥയെയും പ്രതികൂലമായി ബാധിക്കും.
5) ഭക്ഷണത്തിന്റെ അളവ് നിയന്ത്രിക്കുക
അളവിനൊപ്പം തന്നെ വാരി വലിച്ച് കഴിക്കാതിരിക്കാൻ പ്രത്യേകം ശ്രദ്ധിക്കണം. ചെറിയ അളവിൽ ഇടയ്ക്കിടെ ഭക്ഷണം കഴിക്കുക. സാവധാനം ചവച്ചരച്ച് കഴിക്കുന്നത് ദഹനം മെച്ചപ്പെടുത്താൻ സഹായിക്കും.
6) സമ്മർദ്ദത്തെ നിയന്ത്രിക്കുക
സമ്മർദ്ദം ദഹനത്തെ ബാധിക്കുമെന്നതാണ് വാസ്തവം. ധ്യാനം, ശ്വസന വ്യായാമങ്ങൾ, പതിവ് ശാരീരിക പ്രവർത്തനങ്ങൾ തുടങ്ങി സമ്മർദ്ദത്തെ ചെറുക്കാനുള്ള വഴികൾ ശീലിക്കുന്നത് നല്ല ദഹന വ്യവസ്ഥയ്ക്ക് സഹായിക്കും. പതിവായി വ്യായമം ചെയ്യുന്നത് നല്ലതാണ്.
7) ഉറക്കം
ഉറക്കക്കുറവ് കുടലിന്റെ ആരോഗ്യത്തെ പ്രതികൂലമായി ബാധിക്കും. ആറ് മുതൽ എട്ട് മണിക്കൂർ വരെ ഉറങ്ങാൻ ശ്രദ്ധിക്കുക.
8) പഞ്ചസാരയുടെ ഉപയോഗം നിയന്ത്രിക്കുക
കുടലിലെ ആരോഗ്യകരമായ ബാക്ടീരിയകളെ പഞ്ചസാര ഇല്ലതാക്കുന്നു. ഇത് ശരീരത്തിൽ വീക്കത്തിന് കാരണമാകുന്നു. കൃത്രിമ മധുരം ശീലമാക്കുന്നതും കുടലിന്റെ ആരോഗ്യത്തെ ബാധിക്കും. കുടലിലെ ബാക്ടീരിയയുടെ ഘടനയിൽ മാറ്റം വരുത്തി മൈക്രോബയോട്ടയിലെ അസന്തുലിതാവസ്ഥയിലേക്ക് നയിക്കുകയും മൊത്തത്തിലുള്ള കുടലിന്റെ ആരോഗ്യത്തെ ബാധിക്കുകയും ചെയ്യും.
9) മദ്യവും പുകവലിയും ഒഴിവാക്കുക
അമിത മദ്യപാനം കുടലിന്റെ പാളിക്ക് കേടുപാടുകൾ വരുത്താൻ കാരണമാകുന്നു. പോഷകങ്ങളുടെ ആഗിരണം തടസ്സപ്പെടുത്തുകയും കരൾ രോഗം, ദഹനനാളത്തിന്റെ വീക്കം തുടങ്ങിയ അവസ്ഥകൾക്ക് കാരണമാകുകയും ചെയ്യും. പുകവലിക്കുന്നത് ആസിഡ് റിഫ്ലക്സിന്റെ സാധ്യത സൃഷ്ടിക്കുന്നു.
