പത്തനംതിട്ട: ജവാൻ റം ബോട്ടിലിൽ അളവ് കുറഞ്ഞതിന്റെ പേരിൽ കേസ്. തിരുവല്ല ട്രാവൻകൂർ ഷുഗേഴ്സ് ആൻഡ് കെമിക്കൽസിനെതിരെ ലീഗൽ മെട്രോളജി വിഭാഗമാണ് കേസെടുത്തത്. ലീഗൽ മെട്രോളജി നെറ്റ് കണ്ടെന്റ് യൂണിറ്റാണ് പരിശോധനയ്‌ക്ക് ശേഷം കേസെടുത്തത്. സംഭവത്തിൽ ഇന്ന് തിരുവല്ല കോടതിയിൽ റിപ്പോർട്ട് നൽകും.
ഒരു ലിറ്റർ ജവാൻ ബോട്ടിലിൽ അളവ് കുറവുണ്ടെന്നാണ് കണ്ടെത്തിയിരിക്കുന്നത്. രേഖാമൂലം പരാതി കിട്ടിയതിനാലായിരുന്നു ലീഗൽ മെട്രോളജി വിഭാഗം പരിശോധന നടത്തിയിരിക്കുന്നത്. എന്നാൽ, ലീഗൽ മെട്രോളജി വിഭാഗത്തെ തള്ളി ട്രാവൻകൂർ ഷുഗേഴ്സ് ആൻഡ് കെമിക്കൽസ് രംഗത്ത് എത്തിയിരിക്കുകയാണ്. അളവിൽ കുറവുണ്ടെന്ന വാദം അടിസ്ഥാനരഹിതമാണെന്നാണ് ഇവർ പറയുന്നത്.
ലീഗൽ മെട്രോളജി വിഭാഗത്തിന്റെ അളവ് ഉപകരണം വച്ച് തന്നെയാണ് ഓരോ ബോട്ടിലിലും നിറയ്‌ക്കുന്നതെന്നാണ് സ്ഥാപനം പറയുന്നത്. ബിവറേജസ് കോർപ്പറേഷന് വേണ്ടി ജവാൻ റം നിർമിക്കുന്ന സർക്കാർ സ്ഥാപനമാണ് തിരുവല്ല പുളിക്കീഴിലുള്ള ട്രാവൻകൂർ ഷുഗേഴ്സ് ആൻഡ് കെമിക്കൽസ്.
