വിദേശത്തു നിന്നും ഇറക്കുമതി ചെയ്ത് ഉപയോഗിക്കുന്ന പല സാധനങ്ങളും നമുക്ക് ഏറെ പ്രിയപ്പെട്ടതാണ്. നാം ഉപയോഗിക്കുന്ന പല സാധനങ്ങളും വിദേശീയർ കണ്ടുപിടിച്ചവയാണെന്നാണ് പൊതുവെയുള്ള ധാരണ. എന്നാൽ എന്നും ഉപയോഗിക്കുന്ന ഷർട്ടിന്റെ ബട്ടൻസ് മുതൽ കുട്ടികളും മുതിർന്നവരും കളിക്കാൻ ഏറെ ഇഷ്ടപ്പെടുന്ന പാമ്പുംകോണി വരെ ഇന്ത്യയുടെ കണ്ടുപിടിത്തങ്ങളാണെന്നു പറഞ്ഞാൽ നിങ്ങൾ വിശ്വസിക്കുമോ? എന്നാൽ അറിഞ്ഞോളൂ ഇനി പറയുന്നവയെല്ലാം ഇന്ത്യയിൽ കണ്ടുപിടിച്ചവയാണ്.
ചെസ്
രാജഭരണകാലം മുതലേ നമ്മുടെ രാജ്യത്ത് ഏറെ പ്രചാരത്തിലുണ്ടായിരുന്ന കളിയാണ് ചെസ്. അന്ന് ഇത് ചതുരംഗം എന്ന പേരിലായിരുന്നു അറിയപ്പെട്ടിരുന്നത്. പിന്നീട് വിദേശീയരുടെ കൈകൾ ഈ കളിയിൽ പതിഞ്ഞപ്പോൾ ഇതിന്റെ പേര് ചെസ് എന്ന രീതിയിലേക്ക് മാറ്റി മറിക്കപ്പെടുകയായിരുന്നു.
ബട്ടൻസ്
ബട്ടൻസ് ഇല്ലാതെ ഷർട്ട് പൂർത്തിയാകില്ലെന്നു നമുക്ക് അറിയാം. എന്നാൽ ഈ ബട്ടൻസ് എന്ന കുഞ്ഞു സാധനം കണ്ടു പിടിച്ചത് ഇന്ത്യക്കാരായിരുന്നുവെന്നതാണ് യാഥാർത്ഥ്യം. ബട്ടൻസുകൾ രൂപകല്പന ചെയ്യാൻ പണ്ടുകാലത്ത് കടൽ കക്കകളായിരുന്നു കൂടുതലായി ഉപയോഗിച്ചിരുന്നത്.
ഷാംപൂ
പണ്ടുകാലത്ത് ‘ചാംപൂ’ എന്നറിയപ്പെട്ടിരുന്ന ഷാംപൂവും നമ്മുടെ രാജ്യക്കാർ കണ്ടെത്തിയതു തന്നെയാണ്. തല വൃത്തിയാക്കാനും കഴുകാനും ആയുർവേദ കൂട്ടുകൾ ചേർത്തുണ്ടാക്കുന്ന ഒരു തരം എണ്ണകളായിരുന്നു ചാംപൂ. പിന്നീട് കാലങ്ങൾ പോയപ്പോൾ വിവിധ കെമിക്കലുകൾ ചേർത്ത് ഇവ ഇന്ത്യയിലേക്ക് ഇറക്കുമതി ചെയ്യുകയായിരുന്നു.
റൂളർ
ഗണിത പരീക്ഷകൾക്ക് എന്ത് എടുക്കാൻ മറന്നാലും ജ്യോമെട്രിക് ബോക്സ് എടുക്കാൻ കുട്ടികൾ മറക്കാറില്ല. എന്നാൽ ഇതിനുള്ളിലെ മട്ടം ഇന്ത്യക്കാർ കണ്ടുപിടിച്ചതാണെന്നറിയാതെയാണ് ഇവ നാം ഉപയോഗിക്കുന്നത്.
പാമ്പുംകോണി
പാമ്പും കോണി അറിയാത്തവരായി ആരും ഉണ്ടാകാറില്ല. കുട്ടികൾക്കൊപ്പം ഒരുപക്ഷേ മുതിർന്നവരും ഇരുന്ന് കളിക്കുന്ന ഒരു കളിയാണിത്. എന്നാൽ ഇപ്പോഴും നമ്മിൽ പലരും വിചാരിച്ചിരിക്കുന്നത് ഇത് കടൽക്കടന്ന് എത്തിയതാണെന്നാണ്. എന്നാൽ യഥാർത്ഥത്തിൽ പാമ്പുംകോണിയും ഇന്ത്യക്കാർ കണ്ടുപിടിച്ചതാണ്.
