ആധാർ നമ്പർ ഡോക്യുമെന്റിൽ വ്യക്തമാക്കാതെ കെവൈസി ചെയ്യാൻ സാധിച്ചിരുന്നെങ്കിലെന്ന് സ്വകാര്യതയെ ഓർത്ത് പലരും ചിന്തിച്ചിരിക്കാം. രാജ്യത്തെ പൗരന്റെ പ്രധാന രേഖയായി ആധാർ മാറിയതോടെ ഈ നമ്പർ ലഭിച്ചാൽ വ്യക്തിഗത വിവരങ്ങളെല്ലാം തന്നെ ലഭിക്കുന്നു. ഇത് ദുരുപയോഗത്തിനുള്ള സാധ്യത വർദ്ധിപ്പിക്കാറുണ്ട്. ഇതിനാൽ തന്നെ വ്യക്തികൾക്ക് അവരുടെ ആധാർ നമ്പർ ഫയലിൽ കാണിക്കാതെ കെവൈസി മാനദണ്ഡങ്ങൾ പൂർത്തിയാക്കാനാകുന്ന സംവിധാനം നിലവിലുണ്ട്.
ആധാർ പേപ്പർലെസ് ഓഫ്ലൈൻ ഇ-കെവൈസി ഫയലിൽ ആധാറിന്റെ വിശദാംശങ്ങൾ നൽകാതെ റഫറൻസ് ഐഡി മാത്രം നൽകുന്നു. കെവൈസി നടപടികൾ പൂർത്തിയാക്കിയ ശേഷം ഫയൽ ഡൗൺലൗഡ് ചെയ്തെടുക്കാവുന്നതാണ്. യുഐഡിഎഐ മുഖേന തട്ടിപ്പുകൾ കണ്ടെത്തുന്നതിനും ദുരുപയോഗങ്ങൾക്ക് തടയിടുന്നതിനും ഇതിലൂടെ സാധിക്കുന്നു. ആധാർ പേപ്പെർലെസ് ഇ-കെവൈസി ഡോക്യുമെന്റ് എങ്ങനെ ജനറേറ്റ് ചെയ്യാമെന്ന് നോക്കാം…
സിപ് ഫയൽ ഫോർമാറ്റിലാണ് ആധാർ പേപ്പർലെസ് ഇ-കെവൈസി ഫയൽ ലഭ്യമാകുന്നത്. myAadhaar എന്ന പോർട്ടലിൽ നിന്ന് ഇത് ഡൗൺലോഡ് ചെയ്തെടുക്കാവുന്നതാണ്. ഇത് എങ്ങനെയെന്ന് നോക്കാം…
https://myaadhaar.uidai.gov.in/offline-ekyc എന്ന വെബ്സൈറ്റ് സന്ദർശിക്കുക.
ലോഗിൻ ചെയ്ത ശേഷം ആധാർ നമ്പറോ വിഐഡി നമ്പറോ നൽകി ക്യാപ്ച കോഡും ടൈപ്പ് ചെയ്യുക. തുടർന്ന് ഒടിപി ലഭിക്കുന്നതിനായി ക്ലിക്ക് ചെയ്യുക. ഉപയോക്താക്കളുടെ ആധാർ രജിസ്റ്റർ ചെയ്ത മൊബൈൽ നമ്പറിൽ ഒടിപി ലഭിക്കും. ഇത് ടൈപ്പ് ചെയ്ത് സബ്മിറ്റ് നൽകുക.
ഉപയോക്താക്കൾ അവരുടെ ആധാർ ഡാഷ്ബോർഡ് ഓപ്പൺ ചെയ്ത് ഓഫ്ലൈൻ ഇ-കെവൈസി എന്ന ഓപ്ഷൻ തിരഞ്ഞെടുക്കുക.
ഇ-കെവൈസി ഫയൽ ലഭിക്കുന്നതിനായി ഷെയർ കോഡ് നൽകുക. ഫയൽ ഓപ്പൺ ചെയ്യുന്നതിന് ഈ കോഡ് ടൈപ്പ് ചെയ്ത് നൽകേണ്ടതുണ്ട്. ഉപയോക്താക്കളുടെ താത്പര്യാനുസൃതം ഏതെങ്കിലും നാല് അക്കങ്ങൾ നൽകാവുന്നതാണ്. ഇതിന് ശേഷം ഡൗൺലോഡ് ചെയ്യാവുന്നതാണ്.
ആർബിഐയുടെ റീട്ടെയിൽ ഡയറക്ട് പ്ലാറ്റ്ഫോമിൽ ഉപയോക്താവിന് ഓഫ്ലൈൻ പേപ്പർലെസ് ആധാർ ഇ-കെവൈസി ഉപയോഗിക്കാവുന്നതാണ്. ആധാർ നമ്പർ വെളിപ്പെടുത്താതെയാണ് കെവൈസിയുടെ ഓഫ്ലൈൻ ഫയൽ ലഭ്യമാകുന്നത്. ഇതിന് പകരം ഒരു റഫറൻസ് ഐഡി മാത്രമാകും ഉണ്ടാകുക.