ബഹിരാകാശത്ത് ഫലങ്ങൾ വിളവെടുക്കാൻ സാധിക്കുമോയെന്ന പഠനങ്ങൾ നാളുകളായി പുരോഗമിക്കുകയാണ്. അത്തരത്തിൽ പ്രമുഖ ബഹിരാകാശ യാത്രികനായ ഫ്രാങ്ക് റുബിയോ ഓൺ-ഓർബിറ്റ് ടെസ്റ്റ് സിസ്റ്റം (XROOTS) എന്ന പരീക്ഷണം ബഹിരാകാശത്ത് നടത്താൻ പദ്ധതിയിട്ടിരുന്നു. 2022-ൽ മണ്ണില്ലാ പരീക്ഷണം നടത്തുന്നതിനിടെ റുബിയോയുടെ കയ്യിൽ നിന്ന് അബദ്ധത്തിൽ രണ്ട് ചെറിയ തക്കാളികൾ ബഹിരാകാശത്ത് നഷ്ടപ്പെട്ടിരുന്നു. എട്ട് മാസത്തിന് ശേഷം ഐഎസ്എസ് സംഘം കാണാതായ തക്കാളി കണ്ടെത്തി.
ജലാംശം നഷ്ടപ്പെട്ട്, നിറ വ്യത്യാസം വന്ന നിലയിലായിരുന്നു തക്കാളികൾ. എന്നാൽ സൂക്ഷ്മജീവികളുടെയോ ഫംഗസിന്റെയോ വളർച്ച ഉണ്ടായിട്ടില്ലെന്ന് ശാസ്ത്രജ്ഞർ വ്യക്തമാക്കുന്നു. പ്ലാസ്റ്റിക് ബാഗിൽ അടച്ച നിലയിലായിരുന്നു തക്കാളികൾ.
മണ്ണില്ലാതെ സസ്യങ്ങൾ വളർത്തുന്ന ആധുനിക വിദ്യയാണ് xROOTS. ഹൈഡ്രോപോണിക്, എയറോപോണിക് സാങ്കേതിക വിദ്യകളാണ് ഇവിടെ ഉപയോഗിക്കുന്നത്. ഭാവിയിലെ ബഹിരാകാശ പര്യവേഷണ ദൗത്യങ്ങൾക്ക് ആവശ്യമായ സസ്യങ്ങൾ xROOT പരീക്ഷണം വഴി വികസിപ്പിക്കാൻ കഴിയുമെന്ന് നാസ പറഞ്ഞു.
ബഹിരാകാശ യാത്രികർക്ക് ആവശ്യമായ ആഹാരം പാകം ചെയ്യുന്നതിനൊപ്പം അവരുടെ മാനസിക നില മെച്ചപ്പെടുത്തുന്ന പൂന്തോട്ട പരിപാലനം തുടങ്ങിയവയും ഭാവിയിൽ ഇതേ രീതിയിൽ ചെയ്യാവുന്നതാണ്. ബഹിരാകാശ യാത്രയുടെ അതിരുകൾ കടക്കാൻ മനുഷ്യരെ സഹായിക്കുന്നതിലെ സുപ്രധാന നീക്കമാണ് തക്കാളി കണ്ടെത്തിയതിലൂടെ പുറത്തുവന്നിരിക്കുന്നത്. ഇത് കേന്ദ്രീകരിച്ച് പഠനങ്ങൾ പുരോഗമിക്കുകയാണെന്ന് നാസ ശാസ്ത്രജ്ഞർ അറിയിച്ചു.
