സലാറിന് മുന്നോടിയായി വമ്പൻ സർപ്രൈസുമായി ഹോംബാലെ ഫിലിംസ്. കന്നഡയ്‌ക്കും തെലുങ്കിനും മലയാളത്തിനും പുറമെ തമിഴിലും ചുവടു വച്ചിരിക്കുകയാണ് കമ്പനി. തെന്നിന്ത്യൻ പ്രേക്ഷകരുടെ പ്രിയപ്പെട്ട നടിയായ കീർത്തി സുരേഷിനെ നായികയാക്കി രഘുതാത്ത എന്ന തമിഴ് ചിത്രമാണ് ഹോംബാലെ ഫിലിംസ് അണിയിച്ചൊരുക്കുന്നത്. ചിത്രത്തിന്റെ ഗ്ലിംപ്സ് വീഡിയോ അണിയറ പ്രവർത്തകർ പുറത്തുവിട്ടു.
രഘുതാത്തയുടെ തിരക്കഥയും സംവിധാനവും നിര്‍വഹിക്കുന്നത് സുമൻ കുമാറാണ്. കീര്‍ത്തി സുരേഷിനൊപ്പം പ്രധാന കഥാപാത്രങ്ങളായി എം എസ് ഭാസ്‍കറും ദേവദര്‍ശനിയും രവിന്ദ്ര വിജയ്‍യും ആനന്ദസാമിയും ചിത്രത്തിൽ അഭിനയിക്കുന്നു. ഛായാഗ്രാഹണം യാമിനി യഗ്നമൂര്‍ത്തിയാണ്. സ്ത്രീകളുടെ അവകാശങ്ങൾക്കായി പോരാടുന്ന ധീരയായ സ്ത്രീയുടെ കഥയാണ് ചിത്രം പറയുന്നത്.
