മനുഷ്യശരീരത്തിൽ സുപ്രധാന ധർമ്മം നിർവഹിക്കുന്ന പ്രധാന ഘടകമാണ് ചെവി. എന്നാൽ ചെവിലേക്ക് വെള്ളം കയറുകയോ പ്രാണി കയറുകയോ ചെയ്താലുള്ള ബുദ്ധിമുട്ടുകൾ നമുക്കറിയാം. മുറിവുകളോ ചെറിയ പോറലോ ഏൽക്കുന്നത് ചെവിയുടെ ആരോഗ്യത്തെ തന്നെ പ്രതികൂലമായി ബാധിച്ചേക്കാം. ഇതിന് പുറമെ ഹെഡ്ഫോണിന്റെ അമിത ഉപയോഗവും കേൾവി ശക്തിയെ പ്രതികൂലമായി ബാധിക്കുമെന്ന് പഠനങ്ങൾ പറയുന്നു. നീണ്ടു നിൽക്കുന്ന തുമ്മൽ, തണുപ്പടിക്കുന്നത്, കാറ്റടിക്കുന്നത്, തുമ്മൽ വരുമ്പോൾ അത് പിടിച്ചു നിർത്തുന്നത്, വിട്ടുമാറാതെ നിൽക്കുന്ന ജലദോഷം എന്നിവയെല്ലാം ചെവിയുടെ കേൾവിശക്തിയെയും ആരോഗ്യകരമായ പ്രവർത്തനത്തെയും സാരമായി ബാധിച്ചേക്കാം.
പ്രതികൂല സാഹചര്യങ്ങളിൽ നിന്നും ചെവിയുടെ ആരോഗ്യത്തെ എങ്ങനെ സംരക്ഷിക്കാമെന്ന് നോക്കാം…
- ചെവിയിൽ പ്രാണി, ഉറുമ്പ് തുടങ്ങിയവ കയറുകയാണെങ്കിൽ ചെറിയ ഉള്ളി ചേർത്ത് മൂപ്പിച്ച നല്ലെണ്ണ ചെറിയ ചൂടിൽ ചെവിയിലേക്ക് ഒഴിക്കുക. ഇത് ചെവിക്കുള്ളിൽ കടന്ന ജീവി പുറത്തേക്ക് ചാടാൻ സഹായകമാകുന്നു.
- ചെറുപയർ, കുറുന്തോട്ടി വേര്, എള്ള്, ഏലത്തിരി ഇവ പൊടിച്ച് തരികളാക്കുക. ശേഷം കടുകെണ്ണയിൽ മുക്കി കത്തിച്ചെടുക്കുക. ഇതിൽ നിന്നും ഉയരുന്ന പുക ചെവിയിലേക്ക് ഏൽപ്പിക്കുകയാണെങ്കിൽ ചെവിയിൽ കയറിയ പ്രാണിയെ വേഗത്തിൽ പുറത്തെത്തിക്കാം.
- നീരിറക്കത്തിന്റെ ഭാഗമായി ഉണ്ടാകുന്ന പൊട്ടിയൊലിക്കൽ, ചെവി വേദന എന്നിവയ്ക്ക് രാസ്നാദി ചൂർണം കുറുക്കി ചെറുചൂടോടെ ലേപനമിടുന്നത് നല്ലതാണ്. ത്രിഫല പഞ്ചകോലം കവിൾ കൊള്ളുന്നതും ഉത്തമമാണ്.
- വയമ്പ്, വെളുത്തുള്ളി, വരട്ടുമഞ്ഞൾ എന്നിവ കൂവളത്തിന്റെ ഇലയുടെ നീരും ചേർത്ത് എണ്ണ കാച്ചി പുരട്ടുക. ഇത് ചെവിയിൽ പഴുപ്പുണ്ടാകുന്നത് തടയാൻ സഹായിക്കുന്നു.
- വരട്ടുമഞ്ഞൾ നല്ലെണ്ണയിൽ മുക്കി കത്തിച്ചതിന് ശേഷം തീയണച്ച് ചെവിയുടെ സമീപത്ത് വെച്ച് പുക പിടിക്കുക. ചെവിയുടെ സമീപത്ത് വച്ച് പുക അകത്തേക്ക് ഊതിക്കയറ്റുന്നത് ചെവിവേദന കുറയ്ക്കാൻ സഹായകമാണ്.
