തിളങ്ങുന്ന ചർമ്മത്തിന് എന്ത് ചെയ്യണമെന്ന് പലരും ചിന്തിക്കാറുണ്ട്. പുറമെയുള്ള പരീക്ഷണങ്ങൾക്ക് പുറമെ ശരീരത്തിനുള്ളിലേക്കും പോഷകസമൃദ്ധമായ ഭക്ഷണം എത്തിയെങ്കിൽ മാത്രമേ സംരക്ഷണം പൂർത്തിയാകൂ. ഇത്തരത്തിൽ ആരോഗ്യത്തിന് വളരെയധികം ഗുണം ചെയ്യുന്ന ഒന്നാണ് റാഗി. ചെറുധാന്യമെന്ന നിലയിൽ നിരവധി പോഷകങ്ങൾ റാഗിയിലുണ്ട്. ഇതിന് പുറമെ ചർമ സംരക്ഷണത്തിനും റാഗി വളരെ ഉപകാരപ്രദമാണ്. ആന്റിഓക്സിഡന്റുകൾ, വിറ്റാമിനുകൾ, ധാതുക്കൾ എന്നിങ്ങനെ നിരവധി ഘടകങ്ങളാണ് റാഗിയിലൂടെ ശരീരത്തിലെത്തുന്നത്. കഴിക്കുന്നത് പോലെ തന്നെ ചർമം തിളക്കമാർന്നതാക്കുന്നതിനും സംരക്ഷിക്കുന്നതിനും റാഗി ഉപയോഗിച്ചുള്ള ഫെയ്സ് മാസ്ക് നല്ലതാണ്. ഇത് തയാറാക്കുന്നതെങ്ങനെയെന്ന് നോക്കാം…
ആവശ്യമുള്ള സാധനങ്ങൾ….
- റാഗി പൊടി-രണ്ട് ടേബിൾ സ്പൂൺ
- തൈര് -ഒരു ടേബിൾ സ്പൂൺ
- തേൻ-ഒരു ടേബിൾ സ്പൂൺ
- ചെറുനാരങ്ങാ നീര്- ഒരു ടേബിൾ സ്പൂൺ
ബൗളിലേക്ക് റാഗി പൊടിയും തൈരും ചേർത്ത് നന്നായി മിക്സ് ചെയ്യുക. ഇതിലേക്ക് തേനും ചെറുനാരങ്ങാ നീരും ചേർക്കുക. ഇവയെല്ലാം ഒന്നിച്ച് പേസ്റ്റ് രൂപത്തിലാക്കുക. മുഖം നന്നായി കഴുകിയതിന് ശേഷം ഈ ഫെയ്സ്മാസ്ക് ബ്രഷ് ഉപയോഗിച്ചോ വിരലുകൾ ഉപയോഗിച്ചോ മുഖത്തും കഴുത്തിലും പുരട്ടാവുന്നതാണ്. കണ്ണുകളുടെ ഭാഗം ഒഴിവാക്കി വേണം മാസ്കിടാൻ. 15-20 മിനിറ്റുവരെ മുഖത്തിട്ട് ഉണങ്ങിയ ശേഷം വെള്ളമുപയോഗിച്ച് കഴുകി കളയണം. വൃത്താകൃതിയിൽ മസാജ് ചെയ്താകണം കഴുകി കളയേണ്ടത്. ഇതിന് ശേഷം ചെറുചൂട് വെള്ളത്തിൽ മുഖം കഴുകുക. മുഖം വരണ്ടതുപോലെ തോന്നിയാൽ മോയിസ്ചറൈസർ ഇടുക.