ഗുരുവായൂർ ക്ഷേത്രത്തിന്റെ അതേ മാതൃക; അതേ പൂജകൾ, സർപ്പക്കാവ്; കുട്ടികൾക്കായി മത പാഠശാല; അമേരിക്കയിലെ ക്ഷേത്രം വ്യത്യസ്തമാകുമ്പോൾ

ഗുരുവായൂർ ക്ഷേത്രത്തിന്റെ അതേ മാതൃകയിൽ അതേ ചടങ്ങുകളുള്ള ഒരു ക്ഷേത്രമുണ്ട്. അത് കേരളത്തിലോ ഭാരതത്തിലോ അല്ല. അമേരിക്കയിലെ ഹൂസ്റ്റണിലാണ് ഗുരുവായൂർ ക്ഷേത്രത്തിലെ അതേ ചടങ്ങുകളും പ്രതിഷ്ഠയുമുള്ള ക്ഷേത്രം സ്ഥിതി ചെയ്യുന്നത്. ഗുരുവായൂർ ക്ഷേത്രത്തിന്റെ അതേ വാസ്തുവിദ്യയാണ് ഇവിടെയും ഉപയോഗപ്പെടുത്തിയത്.

ബലാലയ പ്രതിഷ്ഠ 2010ൽ

2010 ലാണ് ഹൂസ്റ്റൺ ഗുരുവായൂർ ക്ഷേത്രത്തിന്റെ ബലാലയ പ്രതിഷ്ഠ നടന്നത്. അഞ്ച് വർഷം എടുത്ത്, 2015 ലാണ് ക്ഷേത്ര പ്രതിഷ്ഠ നടന്നത്. ഭാരതത്തിന് പുറത്ത് കേരള വാസ്തുവിദ്യ തനിമയിലും താന്ത്രിക വിദ്യയിലും പിന്തുടരുന്ന എക ക്ഷേത്രം കൂടിയാണിത്.

ഗുരുവായൂർ അമ്പലത്തിൽ എന്തൊക്കെ നിഷ്ടകളുണ്ടോ, എന്തോക്കെ പൂജകളുണ്ടോ അതെല്ലാം ഇവിടെയുമുണ്ട്. ഗുരുവായൂർ ക്ഷേത്രത്തിലെ മേൽശാന്തിയായിരുന്നു ബ്രഹ്‌മശ്രീ കരിയന്നൂർ ദിവാകരൻ നമ്പൂതിപ്പാടാണ് ഇവിടത്തെ തന്ത്രി. ഏകാദേശി വ്രതവും പത്ത് ദിവസം കൊടിയറിയ ഉത്സവും ഉണ്ട്. അടുത്തിടെ സർപ്പക്കാവിൽ നാഗപ്രതിഷ്ഠയും നടത്തി.

ത്രികാല പൂജകളും അയ്യപ്പവിളക്കും

പ്രധാനമായി അയ്യപ്പസ്വാമി, ഗണപതി, ഭദ്രകാളി എന്നീ ഉപദേവതകളാണ് ക്ഷേത്രത്തിലുള്ളത്. ഉഷ പൂജ, ഉച്ചപൂജ, അത്താഴ പൂജ എന്നീ ത്രികാല പൂജകൾ ഗുരുവായൂർ ക്ഷേത്രത്തിലെ അതേ നിഷ്ടയോടെ ഇവിടെയും നടക്കുന്നു. മണ്ഡലകാലത്ത് അയ്യപ്പവിളക്കും പടിപൂജയും നടക്കുന്നുണ്ട്. മകരവിളക്കിനും ഇവിടെ പ്രത്യേക പൂജയുണ്ട്. നവരാത്രി കാലത്തും ക്ഷേത്രത്തിൽ പ്രത്യേക ചടങ്ങുകളുണ്ട്. കൂടാതെ എല്ലാംമാസവും മുപ്പെട്ട് വെള്ളിയാഴ്ചയും ഭഗവതി സേവയും നടക്കുന്നുണ്ട്. അമേരിക്കയുടെ വിവിധ ഭാഗങ്ങളിൽ നിന്നും ഇവിടെ എത്തി താമസിച്ച് ഭജനമിരിക്കുന്നതും പതിവാണ്.

ഭജന മന്ദിരത്തിൽ നിന്നും ക്ഷേത്രത്തിലേക്ക്

മലയാളിയായ ശശീധരൻ നായരാണ് ക്ഷേത്രമെന്ന ആശയത്തിന് തുടക്കമിട്ടത്. 1979 ലാണ് അദ്ദേഹം ഹൂസ്റ്റണിലെത്തിയത്. ഭജന നടത്താനുളള മന്ദിരമായിരുന്നു ആദ്യം പദ്ധതിയിട്ടത്. പിന്നീടാണ് ക്ഷേത്രമെന്ന ആശയത്തിലേക്ക് എത്തിച്ചേർന്നത്.
2008ലാണ് ക്ഷേത്രത്തിനായുള്ള സ്ഥലം ശശീധരൻ നായരും സംഘവും ചേർന്ന് വാങ്ങിയത്. കാണിപ്പയ്യൂർ എത്തിയാണ് സ്ഥലം പരിശോധിച്ചതെന്ന് ശശീധരൻനായർ പറഞ്ഞു. ഭഗവാന്റെ സാന്നിദ്യമുളള സ്ഥലമാണിതെന്നാണ് കാണിപ്പയ്യൂർ പറഞ്ഞത്, ശശീധരൻ നായർ ഓർക്കുന്നു.

മത പാഠശാലയും മലയാള പാഠശാലയും

ക്ഷേത്രത്തിനോട് ചേർന്ന് മലയാളം മത പാഠശാലയും പ്രവർത്തിക്കുന്നുണ്ട്. ഒന്ന് മുതൽ നാലാം ഗ്രേഡ് വരെയാണ് നിലവിൽ പ്രവർത്തിക്കുന്നത്. മലയാളത്തിന്റെ ആദ്യാക്ഷരം മുതൽ ഇവിടെ പഠിപ്പിച്ച് തുടങ്ങുന്നു. കൂടാതെ സനാതന ധർമ്മവുമായി ബന്ധപ്പെട്ട് കാര്യങ്ങളും കുട്ടികളെ അഭ്യസിപ്പിക്കുന്നുണ്ട്. നാട്ടിൽ നിന്ന് എല്ലാം വിട്ട് അമേരിക്കയിൽ താമസിക്കുന്ന മലയാളികൾക്ക് ആശ്രയവും ശക്തിയുമാണ് ഇന്ന് ഹൂസ്റ്റൺ ഗുരുവായൂർ ക്ഷേത്രം