കേപ് ടൗണിൽ ജനുവരി മൂന്നിന് ആരംഭിക്കുന്ന ദക്ഷിണാഫ്രിക്കയ്‌ക്കെതിരായ രണ്ടാം ടെസ്റ്റ് മത്സരത്തിനുള്ള ടീമിൽ ആവേശ് ഖാനെ ഉൾപ്പെടുത്തി. കണങ്കാലിനേറ്റ പരിക്കിൽ നിന്ന് ഷമി സുഖം പ്രാപിച്ച് വരികയാണെന്നും താരത്തിന് പകരക്കാരനായാണ് ആവേശ് ഖാനെ ടീമിൽ ഉൾപ്പെടുത്തിയതെന്നും ബിസിസിഐ അറിയിച്ചു. അവസരം ലഭിച്ചാൽ ആവേശ് ഖാന് ഇന്ത്യയ്‌ക്കായി അരങ്ങേറ്റ ടെസ്റ്റ് കളിക്കാൻ സാധിക്കും.
സെഞ്ചൂറിയനിലെ സൂപ്പർസ്പോർട് പാർക്കിൽ നടന്ന ആദ്യ ടെസ്റ്റിൽ ഇന്ത്യ ഇന്നിംഗ്സിനും 32 റൺസിനും തോറ്റതിന് പിന്നാലെയാണ് ആവേശ് ഖാന് ടീമിൽ ഇടം ലഭിച്ചത്. പ്രോട്ടീസിനെതിരായ മൂന്ന് മത്സരങ്ങളടങ്ങിയ ഏകദിന പരമ്പരയിൽ ആവേശ് ഖാൻ ആറ് വിക്കറ്റുകൾ സ്വന്തമാക്കിയിരുന്നു. താരം എട്ട് ഏകദിനങ്ങളിലും 19 ടി20യിലുമാണ് ഇന്ത്യയെ പ്രതിനിധീകരിച്ചിട്ടുള്ളത്. ഷമിയ്ക്ക് പകരക്കാരനായി ടീമിലെടുത്ത പ്രസിദ്ധ് കൃഷ്ണ ആദ്യ ടെസ്റ്റിൽ നിറം മങ്ങിയിരുന്നു.
ആദ്യ ടെസ്റ്റിൽ 163 റൺസിന്റെ ഒന്നാം ഇന്നിംഗ്സ് കടവുമായി മൂന്നാം ദിനം രണ്ടാം ഇന്നിംഗ്സ് ബാറ്റിങ്ങിനിറങ്ങിയ ഇന്ത്യയെ ദക്ഷിണാഫ്രിക്ക 34.1 ഓവറിൽ 131 റൺസിന് എറിഞ്ഞിടുകയായിരുന്നു. വിരാട് കോലിക്ക് മാത്രമാണ് ഇന്ത്യൻ നിരയിൽ ഭേദപ്പെട്ട പ്രകടനം കാഴ്ചവയ്‌ക്കാനായത്. ഇതോടെ രണ്ട് മത്സരങ്ങളടങ്ങിയ പരമ്പരയിൽ ദക്ഷിണാഫ്രിക്ക മുന്നിലെത്തി. കേപ് ടൗണിൽ നടക്കുന്ന രണ്ടാം ടെസ്റ്റിൽ ഇന്ത്യ വിജയിച്ചാൽ പരമ്പര സമനിലയിലാകും.
