മലയാളികളുടെ പ്രിയനായകനാണ് ഉണ്ണി മുകുന്ദൻ. ഒരുപിടി ഹിറ്റ് ചിത്രങ്ങൾ സമ്മാനിച്ച് മലയാളികളുടെ മനസിലിടം നേടിയ താരമാണ് ഉണ്ണി മുകുന്ദൻ. 2022 ഡിസംബർ 31 നാണ് റിലീസ് ചെയ്തതെങ്കിലും ഉണ്ണിയുടെ മാളികപ്പുറം കഴിഞ്ഞ വർഷത്തെ സൂപ്പർ ഹിറ്റുകളിൽ ഒന്നായിരുന്നു. രഞ്ജിത്ത് സംവിധാനം ചെയ്യുന്ന ജയ്ഗണേഷാണ് താരത്തിന്റെ ഏറ്റവും പുതിയ ചിത്രം. തന്റെ പ്രിയപ്പെട്ട ആരാധകർക്ക് പുതുവത്സര ആശംസകളുമായി എത്തിയിരിക്കുകയാണ് ഉണ്ണി മുകുന്ദൻ. സമൂഹമാദ്ധ്യമമായ ഇൻസ്റ്റഗ്രാമിലൂടെയായിരുന്നു താരം ആശംസകൾ അറിയിച്ചുകൊണ്ടുള്ള വീഡിയോ പങ്കുവച്ചത്.
View this post on Instagram
‘2023 എല്ലാ പ്രിയപ്പെട്ടവർക്കും സന്തോഷം നിറഞ്ഞ വർഷമായിരുന്നു എന്ന് ഞാൻ വിശ്വസിക്കുന്നു. അങ്ങനെയല്ലെങ്കിൽ 2024 എല്ലാവരുടെയും ജീവിതത്തിലെ ഏറ്റവും നല്ല വർഷമായിരിക്കട്ടെ. ഒപ്പം ഈ വർഷം നിങ്ങളുടെ എല്ലാ സ്വപ്‌നങ്ങളും സഫലമാകട്ടെ, അതിനുള്ള ആരോഗ്യവും മാനോധൈര്യവും സർവ്വേശ്വരൻ നിങ്ങൾക്ക് നൽകട്ടെയെന്നും ഞാൻ ആത്മാർത്ഥമായി പ്രാർത്ഥിക്കുന്നു’.
‘വ്യക്തിപരമായി പറയുകയാണെങ്കിൽ എന്റെ കരിയറിലെ ഏറ്റവും മികച്ച വർഷമായിരുന്നു 2023. തൊഴിൽപരമായും വ്യക്തി ജീവിതത്തിലും മികച്ച വർഷമായിരുന്നു. 2024 ൽ എന്റെ പുതിയ ചിത്രമായ ജയ് ഗണേഷാണ് റിലീസാകാനിരിക്കുന്നത്. ഏപ്രിൽ 11 ന് ചിത്രം തീയേറ്ററുകളിലെത്തും. വളരെ മികച്ചൊരു ചിത്രമായിരിക്കും ജയ്ഗണേഷ്. ഈ വർഷം എന്റേതായി പ്രഖ്യാപിച്ച മറ്റ് ചിത്രങ്ങളും പ്രദർശനത്തിനെത്തുന്നുണ്ട്. വെട്രിമാരനൊപ്പമുള്ള തമിഴ് സിനിമയടക്കം വരാനിരിക്കുകയാണ്. നമ്മളെല്ലാവർക്കും വളരെ നല്ലൊരു വർഷമായിരിക്കട്ടെ 2024. എല്ലാവർക്കും ഞാൻ നന്മകൾ ആശംസിക്കുന്നു. ഒപ്പം എല്ലാവർക്കും എന്റെ പുതുവത്സാരാശംസകൾ. എന്നായിരുന്നു ഉണ്ണി മുകുന്ദന്റെ വാക്കുകൾ.
