ശ്രീനഗർ: പാക് അധിനിവേശ കാശ്മീരിൽ കാട്ടുതീ മറ്റിടങ്ങളിലേക്കും വ്യാപിക്കുന്നു. ഇന്ത്യയുടെ ഭാഗങ്ങളിലേക്കും തീ വ്യാപിക്കുന്നതായും സൈനികർ ജാഗ്രത പാലിക്കുകയാണെന്നും സേനാവൃത്തങ്ങൾ അറിയിച്ചു. സുരക്ഷാ സേന ജാഗ്രത പുലർത്തുന്നതായി ഉദ്യോഗസ്ഥർ അറിയിച്ചു. കാട്ടുതീയുടെ മറവിലുള്ള നുഴഞ്ഞുകയറ്റം തടയുന്നതിനുള്ള പ്രവർത്തനങ്ങളും സേന ഏകോപിപ്പിച്ചിട്ടുണ്ട്.
‘ജമ്മു കശ്മീരിലെ പൂഞ്ച് ജില്ലയിലെ നിയന്ത്രണ രേഖയ്ക്ക് സമീപത്തേയ്ക്കും തീ വ്യാപിക്കുന്നുണ്ട്. കഴിഞ്ഞ ദിവസം രാത്രി പാക് അധിനിവേശ കശ്മീരിൽ ഉണ്ടായ തീപിടിത്തം മെൻധർ സബ് ഡിവിഷനിലെ ബാലകോട്ട് സെക്ടറിലേക്ക് പടരുകയായിരുന്നു. തീപിടിത്തിന്റെ മറവിൽ ഭീകരർ നുഴഞ്ഞുകയറുന്നില്ലെന്ന് ഉറപ്പാക്കാൻ നിയന്ത്രണരേഖയിൽ ജാഗ്രതാ നിർദ്ദേശം നൽകിയിട്ടുണ്ട്. കാവൽ നിൽക്കുന്ന സൈനികർ തീ അണയ്ക്കാനുള്ള ശ്രമങ്ങൾ നടത്തിവരുകയാണ്’.- ഉദ്യോഗസ്ഥർ അറിയിച്ചു.