വ്യക്തികളുടെ ഇന്റർനെറ്റ് ഉപയോഗത്തെക്കുറിച്ചുള്ള വിവരങ്ങൾ ശേഖരിക്കുന്നതിനായി ഗൂഗിൾ ഉപയോഗിച്ചിരുന്ന ‘തേർഡ് പാർട്ടി കുക്കീസ്’ നിർത്തലാക്കി. ഗൂഗിൾ ക്രോമാണ് കുക്കീസ് നിർത്തലാക്കിയത്. ഉപയോക്താവിന്റെ പ്രവർത്തനങ്ങൾ നിരീക്ഷിക്കുന്നതിനായിട്ടാണ് സാധാരണയായി തേർഡ് പാർട്ടി കുക്കീസ് ഉപയോഗിക്കുന്നത്.
പരീക്ഷണാടിസ്ഥാനത്തിലാണ് നിലവിൽ കുക്കീസ് നിർത്തലാക്കിയിട്ടുള്ളത്. അതോടൊപ്പം തന്നെ പുതിയ ട്രാക്കിങ് പ്രൊട്ടക്ഷൻ ഫീച്ചർ ഗൂഗിൾ ക്രോം അവതരിപ്പിക്കുകയും ചെയ്തു. ഇത് ക്രോമിന്റെ വിൻഡോസ്, ലിനക്‌സ്, മാക്ക്, ആൻഡ്രോയിഡ്, ഐഒഎസ് വേർഷനുകളിൽ ലഭ്യമാവും. ഏകദേശം മൂന്ന് കോടിയോളം ആളുകളിലേക്കാണ് ഇപ്പോൾ ഈ മാറ്റം എത്തിക്കുക. ആഗോളതലത്തിൽ എല്ലാ ഉപയോക്താക്കൾക്കും ഈ വർഷാവസാനത്തോടെ ഇത് എത്തിക്കും. 2019 മുതൽ തന്നെ ഈ സുരക്ഷാ മാറ്റങ്ങൾ കൊണ്ടുവരാനുള്ള ശ്രമങ്ങൾ ഗൂഗിൾ ക്രോം നടത്തുന്നുണ്ട്. കുക്കീസ് വിലക്കുന്നതോടെ ഉപയോക്താക്കൾക്ക് ബ്രൗസ് ചെയ്യുന്നതിൽ കൂടുതൽ സ്വകാര്യതയുണ്ടാകും.
എന്നാൽ ചില പരസ്യ ദാതാക്കൾ ഈ മാറ്റത്തിനെതിരെ വന്നിട്ടുണ്ട്. പരസ്യ വിതരണത്തിന് ഇത്തരത്തിലുള്ള കുക്കീസ് ആവശ്യമാണെന്നാണ് അവരുടെ വാദം. സാധാരണ ഒരു വ്യക്തി ഗൂഗിളിൽ ചില വെബ്‌സൈറ്റുകൾ സന്ദർശിച്ചതിന് ശേഷം ആ വെബ്‌സൈറ്റുമായി ബന്ധപ്പെട്ട പരസ്യങ്ങൾ അവരിലേക്ക് എത്താറുണ്ട്. ഇത്തരത്തിൽ പരസ്യങ്ങൾ വരുന്നതിന് കാരണം തേർഡ് പാർട്ടി കുക്കീസാണ്.
