ന്യൂഡൽഹി: രാജ്യതലസ്ഥാനത്ത് അതിശൈത്യം തുടരുന്ന സാഹചര്യത്തിൽ സ്കൂളുകൾക്ക് അവധി നീട്ടി. ജനുവരി 12 വരെയാണ് സംസ്ഥാനത്തെ അഞ്ചാം ക്ലാസ്സ് വരെയുള്ള ക്ലാസുകൾക്ക് അവധി നൽകിയിരിക്കുന്നത്. ശീതകാറ്റിന്റെയും അതിശൈത്യത്തിന്റെയും അടിസ്ഥാനത്തിൽ രാജ്യതലസ്ഥാനത്തെ എല്ലാ സ്കൂളുകൾക്കും ജനുവരി പത്ത് വരെ അവധി പ്രഖ്യാപിച്ചിരുന്നു. പിന്നീട് ഇത് പിൻവലിക്കുകയും ചെയ്തിരുന്നു. എന്നാൽ ഇപ്പോൾ നഴ്സറി ക്ലാസുകൾ മുതൽ അഞ്ചാം ക്ലാസ് വരെയുള്ള എല്ലാ സ്കൂളുകൾക്കും അവധി പ്രഖ്യാപിച്ചിരിക്കുകയാണ്. ഇതേ സംബന്ധിച്ച ഉത്തരവ് ഡൽഹി വിദ്യാഭ്യാസ മന്ത്രി അതിഷി പുറത്തിറക്കി.
മറ്റ് ഉത്തരേന്ത്യൻ സംസ്ഥാനങ്ങളായ രാജസ്ഥാൻ, ഹരിയാന, പഞ്ചാബ് എന്നിവിടങ്ങളിലും അതിശൈത്യം തുടരുകയാണ്. അടുത്ത ദിവസങ്ങളിൽ തണുപ്പ് വർദ്ധിക്കാൻ സാധ്യതയുണ്ടെന്ന് കേന്ദ്ര കാലാവസ്ഥാ വകുപ്പ് അറിയിച്ചു. പഞ്ചാബ്, ഹരിയാന സംസ്ഥാനങ്ങളിൽ ശരാശരി താപനില 9-12 ഡിഗ്രി സെൽഷ്യസാണ്. രാജസ്ഥാൻ, ഡൽഹി, മദ്ധ്യപ്രദേശ് എന്നിവിടങ്ങളിൽ 13-16 ഡിഗ്രി സെൽഷ്യസുമാണ്.
ഡൽഹിയിൽ അതിശൈത്യത്തിനൊപ്പം കനത്ത മൂടൽ മഞ്ഞ് തുടരുന്ന സാഹചര്യത്തിൽ റെയിൽവേ-റോഡ് ഗതാഗതം തകരാറിലായിരിക്കുകയാണ്. 20-ഓളം ട്രെയിനുകളാണ് നിലവിൽ വൈകി ഓടുന്നത്. കൂടാതെ റോഡ് അപകടങ്ങളും വർദ്ധിക്കുകയാണ്.
