ലോക സിനിമാ പ്രേമികൾ ഒന്നടങ്കം കാത്തിരുന്ന 81-ാമത് ഗോൾഡൻ ഗ്ലോബ് പുരസ്കര പ്രഖ്യാപനം പുരോഗമിക്കുന്നു. ബാർബിയും ഓപ്പൺഹൈമറും തമ്മിലുള്ള വാശിയേറിയ പോരാട്ടത്തിനാണ് സിനിമാ ലോകം സാക്ഷ്യം വഹിക്കുന്നത്. 9 നോമിനേഷനുകളുമായി ബാർബിയാണ് നാമനിർദ്ദേശം ചെയ്യപ്പെട്ട സിനിമകളുടെ പട്ടികയിൽ ഒന്നാമത്. എട്ട് നോമിനേഷനുകളാണ് ഓപ്പൺഹൈമറിനുള്ളത്.
ഓപ്പൺഹൈമറാണ് ആദ്യ പുരസ്കാരം സ്വന്തമാക്കിയത്. മികച്ച സഹനടനായി റോബർട്ട് ഡൗണി ജൂനിയറിനെ തിരഞ്ഞെടുത്തു. ഓപ്പൺഹൈമറിലെ ലൂയിസ് സ്ട്രോസിന്റെ അഭിനയത്തിനാണ് അവാർഡ്. റോബർട്ട് ഡൗണിയുടെ മൂന്നാം ഗോൾഡൻ ഗ്ലോബ് പുരസ്കാരമാണ് ഇത്. ഡാവിൻ ജോയ് റാൻഡോൾഫാണ് മികച്ച സഹനടി. ‘ദ ഹോൾഡോവേഴ്സിലെ’ അഭിനയത്തിനാണ് നേട്ടം.
ഓപ്പൺഹൈമർ ഒരുക്കിയ ക്രിസ്റ്റഫർ നോളൻ ആണ് മികച്ച സംവിധായകൻ. മികച്ച അനിമേറ്റഡ് ചിത്രമായി ‘ദി ബോയ് ആന്റ് ദി ഹെറോണിനെ’ തിരഞ്ഞെടുത്തു. ഇംഗ്ലീഷ് ഇതര ഭാഷ ചിത്രങ്ങളിൽ ഫ്രഞ്ച് സിനിമയായ ‘അനാറ്റമി ഓഫ് എ ഫാൾ’ മികച്ച ചിത്രമായി തിരഞ്ഞെടുത്തു. മികച്ച തിരക്കഥയ്ക്കും ചിത്രം തിരഞ്ഞെടുക്കപ്പെട്ടു. ജസ്റ്റിൻ ട്രയറ്റിനും ആർതർ ഹരാരിയും ചേർന്നാണ് ചിത്രമൊരുക്കിയത്.
