ഉത്തരാഖണ്ഡിലെ ഗർവാൾ ഹിമാലയത്തിന്റെ ഹൃദയഭാഗത്ത് സ്ഥിതി ചെയ്യുന്ന മനോഹരമായ സ്ഥലമാണ് ചന്ദ്രശില. ട്രക്കിംഗ് ഇഷ്ടപ്പെടുന്നവരുടെ സ്വപ്ന ഇടം കൂടിയാണ് ഇവിടം. 13123 അടി ഉയരത്തിലുള്ള ചന്ദ്രശില സാഹസികത മാത്രമല്ല ആത്മീയതയും പ്രധാനം ചെയ്യുന്നുണ്ട്. ലോകത്തിലെ ഏറ്റവും ഉയരം കൂടിയ ശിവ ക്ഷേത്രമായ തുംഗ് ക്ഷേത്രം സ്ഥിതി ചെയ്യുന്നത് ഇവിടെയാണ്.
ചോപ്തയിൽ നിന്നാണ് ചന്ദ്രശിലയിലേക്കുള്ള യാത്ര ആരംഭിക്കുന്നത്. വളരെ ഭംഗിയുള്ള ഹിൽസ്റ്റേഷനും ട്രെക്കിംഗിനുള്ള ബേസ്ക്യാമ്പുമാണ് ചോപ്ത. സാഹസികത ഇഷ്ടപ്പെടുന്നവർ ചോപ്തയിൽ നിന്ന് ഏകദേശം 3.5 കിലോമീറ്റർ അകലെയുള്ള തുംഗനാഥിലേക്ക് ട്രെക്കിംഗ് ആരംഭിക്കും. ട്രെക്കിംഗിന്റെ അവസാനം ആവുമ്പോഴേക്കും അൽപ്പം വെല്ലുവിളി നിറഞ്ഞ പാതകളാണ്. എന്നാൽ അവ സമ്മാനിക്കുക മനോഹരമായ നിമിഷങ്ങളാണ്.
ട്രെക്കിംഗ് കഴിഞ്ഞ് ചന്ദ്രശിലയിൽ എത്തി കഴിഞ്ഞാൽ സഞ്ചാരികളെ കാത്തിരിക്കുന്നത് ഗർവാൾ ഹിമാലയത്തിന്റെ വിശാലമായ കാഴ്ചയാണ്!. അതോടൊപ്പം അനുകൂല കാലാവസ്ഥയാണെങ്കിൽ നന്ദാദേവി, ത്രിശൂൽ, ചൗഖംബ എന്നിവയുൾപ്പെടെയുള്ള ഏറ്റവും പ്രശസ്തമായ ചില കൊടുമുടികളും യാത്രക്കിടയിൽ കാണാം. അതിമനോഹരമായ സൂര്യോദയത്തിനും അസ്തമയ കാഴ്ചകൾക്കും പ്രസിദ്ധമാണ് ചന്ദ്രശില. കൂടാതെ ഓക്ക്, റോഡോഡെൻഡ്രോൺ, ദേവദാരു എന്നിവയുടെ ഇടതൂർന്ന വനങ്ങളിലൂടെയാണ് ഇവിടേക്കുള്ള ട്രെക്കിംഗ്. ഹിമാലയൻ വന്യജീവികളായ കസ്തൂരി മാൻ, ഹിമാലയൻ തഹർ, നിരവധി ഇനം പക്ഷികൾ എന്നിവയെയും യാത്രയിൽ കാണാൻ സാധിക്കും. ആത്മീയത തേടുന്നവർക്കുള്ള ഒരിടം കൂടിയാണിവിടം.
ഉത്തരാഖണ്ഡിലെ ഗർവാൾ മേഖലയിലുടനീളമുള്ള അഞ്ച് ശിവ ക്ഷേത്രങ്ങളുടെ കൂട്ടമായ പഞ്ച് കേദാറുകളിൽ ഒന്നാണ് തുംഗനാഥ് ക്ഷേത്രം. ഹിന്ദുക്കൾക്കിടയിൽ പ്രാധാന്യമുള്ള ഈ ക്ഷേത്രത്തിന് ആയിരം വർഷത്തിലേറെ പഴക്കമുണ്ടെന്ന് വിശ്വസിക്കപ്പെടുന്നു. തുംഗനാഥിലേക്കുള്ള യാത്ര ഒരു ആത്മീയ യാത്രയാണ്. റോഡോഡെൻഡ്രോൺ വനങ്ങളാൽ ചുറ്റപ്പെട്ട പാത, ഹിമാലയൻ കൊടുമുടികളുടെ മനോഹരമായ കാഴ്ചകൾ സമ്മാനിക്കും.
സഞ്ചാരികൾക്ക് വർഷം മുഴുവനും ഇവിടെ ട്രെക്കിംഗ് നടത്താൻ സാധിക്കും. ഏപ്രിൽ മുതൽ ജൂൺ വരെ ട്രെക്കിംഗിന് ഏറ്റവും പ്രചാരമുള്ള സമയമാണ്. അനുകൂല കാലാവസ്ഥയും, യാത്രാപാതയുമാണ് ഉണ്ടായിരിക്കുക. ജൂലൈ മുതൽ സെപ്തംബർ വരെയുള്ള സമയം കനത്ത മഴയായിരിക്കും. മൺസൂൺ കാലത്തെ ട്രെക്കുകൾ വെല്ലുവിളി നിറഞ്ഞതാണ്, എന്നാലും മനോഹരമായ പ്രകൃതിഭംഗികൾ ആസ്വദിക്കാൻ സാധിക്കും. സാഹസികതയെ ഇഷ്ടപ്പെടുന്ന നിരവധി പേരാണ് ഈ സമയത്ത് ഇവിടെ ട്രെക്കിംഗിനായി എത്തുന്നത്.
ഒക്ടോബർ മുതൽ നവംബർ വരെ തെളിഞ്ഞ ആകാശവും സുഖകരമായ കാലാവസ്ഥയുമായിരിക്കും. ഇത് ട്രെക്കിംഗിനുള്ള മികച്ച സമയമാണ്. ഡിസംബർ മുതൽ മാർച്ച് വരെ മഞ്ഞിനാൽ മൂടപ്പെട്ട ചന്ദ്രശിലയുടെ മറ്റൊരു ഭംഗി ആസ്വദിക്കാൻ സാധിക്കും. സാഹസികത ആഗ്രഹിക്കുന്നവർക്ക്, മഞ്ഞുമൂടിയ പാതകളിൽ ട്രെക്കിംഗ് നടത്താനുള്ള അവസരമാണ് ഈ മാസങ്ങൾ നൽകുന്നത്. എന്നാൽ ഇത് കൂടുതൽ വെല്ലുവിളി നിറഞ്ഞ ഒരു അനുഭവമായിരിക്കും ഇത് നൽകുക.
