മലയാള സിനിമയെയും താരങ്ങളെയും വനോളം പുകഴ്ത്തി ശ്രീലങ്കൻ ക്രിക്കറ്റ് ഇതിഹാസം മുത്തയ്യ മുരളീധരൻ. ഒരു എഫ്.എം റേഡിയോക്ക് നൽകിയ അഭിമുഖത്തിലാണ് താരം മലയാള സിനിമയോടും താരങ്ങളോടുമുള്ള ഇഷ്ടം വെളിപ്പെടുത്തിയത്. ഇഷ്ട താരത്തിന്റെ റാങ്ക് പട്ടികയിൽ മുരളീധരൻ ഒന്നാം റാങ്ക് നൽകുന്നത് മലയാളത്തിന്റെ മോഹൻലാലിനാണ്. ലാലേട്ടന്റെ അഭിനയ പ്രകടനങ്ങൾ എടുത്തുപറഞ്ഞാണ് മുരളീധരൻ ഇഷ്ടം അരക്കിട്ടുറപ്പിക്കുന്നത്.
എല്ലാരെക്കാളും മുന്നിലാണ് മോഹൻലാലിന്റെ സ്ഥാനം. അദ്ദേഹത്തിന്റെ ലൂസിഫറിലെ പ്രകടനം വളരെ ഇഷ്ടപ്പെട്ടിരുന്നു. ഓരോ ചിത്രങ്ങളിലെ വൈവിധ്യമാർന്ന കഥാപാത്രങ്ങളും അതിലെ പ്രകടനങ്ങളും അത്രയേറെ മികച്ചതാണ്. തീർച്ചയായും, അതുകൊണ്ട് തന്നെയാണ് മോഹൻലാൽ എല്ലാർക്കും മുകളിൽ നിൽക്കുന്നത്.
ലാൽ കഴിഞ്ഞാൽ മമ്മൂട്ടി, ജയറാം, പൃഥ്വിരാജ് തുടങ്ങിയ താരങ്ങളെയും ഇഷ്ടമാണ്. ഇവരുടെ സിനിമകൾ കാണാറുണ്ടെന്നും ജയറാമിന്റെ കോമഡി വളരെ ഇഷ്ടമാണ്- മുത്തയ്യ പറഞ്ഞു.ദുൽഖർ സൽമാൻ, ഫഹദ് ഫാസിൽ എന്നിവരുടെ ചിത്രങ്ങളും കാണാറുണ്ട്. അവരുടെ പ്രകടനവും പ്രശംസ അർഹിക്കുന്നുണ്ട്.- മുരളീധരൻ പറഞ്ഞു. മോഹൻലാലിനെ കുറിച്ചുള്ള മുത്തയ്യയുടെ പ്രശംസ സോഷ്യൽ മീഡിയയിൽ വൈറലായി.