എന്നും ഓർത്തിരിക്കാൻ കഴിയുന്ന ആനന്ദകരമായ വേളകളാണ് യാത്രകൾ പലപ്പോഴും നമുക്ക് പ്രദാനം ചെയ്യുന്നത്. യാത്രാപ്രേമികൾ പോകാൻ ഇഷ്ടപ്പെടുന്ന സ്ഥലങ്ങളിലൊന്നാണ് ദ്വീപ സമൂഹങ്ങൾ. മാലദ്വീപും ലക്ഷദ്വീപും വാർത്തകളിൽ ഇടംപിടിച്ചപ്പോൾ മറ്റുള്ളവരെ പോലെ തന്നെ നമ്മിൽ പലരും കരുതിയിട്ടുണ്ടാകും മാലദ്വീപിനെ മാറ്റി നിർത്തി ലക്ഷദ്വീപിലേക്കൊരു യാത്ര. എന്നാൽ ലക്ഷദ്വീപ് മാത്രമല്ല നമ്മുടെ ഈ ഇന്ത്യാ മഹാരാജ്യത്ത് ദ്വീപ സമൂഹങ്ങളായുള്ളത്. വൈവിധ്യങ്ങളടങ്ങിയ നിരവധി ദ്വീപ സമൂഹങ്ങളാണ് യാത്രപ്രേമികളെ കാത്തിരിക്കുന്നത്. ഭാരതത്തിലെ ചില ദ്വീപ സമൂഹങ്ങൾ പരിചയപ്പെടാം..
ലക്ഷദ്വീപ്
വാർത്തകളിൽ നിറഞ്ഞു നിന്ന ലക്ഷദ്വീപിൽ നിന്നും തന്നെ തുടങ്ങാം. ധാരാളം വിനോദസഞ്ചാരികൾ എത്തുന്ന ദ്വീപ സമൂഹമാണ് ലക്ഷദ്വീപ്. പവിഴപ്പുറ്റുകളാൽ വൈവിധ്യമാർന്ന ലക്ഷദ്വീപിലെ സ്കൂബാ ഡൈവിംഗും സ്നോർക്കേലിംഗും ഇവിടേക്കു വരുന്ന വിനോദസഞ്ചാരികൾക്ക് വേറിട്ട അനുഭൂതി നൽകുന്നു.
മൺറോ തുരുത്ത്
കൊല്ലം ജില്ലയിലെ അടഷ്ടമുടിക്കായലിനും കല്ലടയാറിനും ഇടയിൽ സ്ഥിതി ചെയ്യുന്ന ഒരു കൊച്ചു ദ്വീപ സമൂഹമാണ് മൺറോ തുരുത്ത്. കൊല്ലത്തു നിന്നും 27 കിലോമീറ്റർ ദൂരമാണ് ഇവിടേക്കുള്ളത്. ചെറുതോടുകളും, കായലുകളും, കനാലുകളും പരസ്പരം വേർതിരിക്കുന്ന ഈ ദ്വീപിൽ മത്സ്യസമ്പത്ത് ധാരാളമാണ്. ഓണാഘോഷത്തിന്റെ ഭാഗമായി കല്ലടയാറ്റിൽ നടക്കുന്ന ജലോത്സവം ഈ മേഖലയിലെ പ്രധാന ആഘോഷമാണ്. മൺറോ തുരുത്തിലൂടെയുളള ജലയാത്രകൾ ഗ്രാമീണ ജീവിതം അടുത്തറിയാനും സ്വച്ഛമായ ഉല്ലാസത്തിനും യോജിച്ചവയാണ്.
സ്വരാജ് ദ്വീപ്
ആൻഡമാൻ നിക്കോബാർ ദ്വീപ സമൂഹങ്ങളിലൊന്നായ സ്വരാജ് ദ്വീപ് ലോകത്തിലെ മികച്ച ബീച്ചുകളിൽ ഒന്നാണ്. ഹാവ്ലോക്ക് ദ്വീപ് എന്നാണ് ഇത് മുമ്പ് അറിയപ്പെട്ടിരുന്നത്. ഇളം നീല നിറത്തിലൂടെ കാഴ്ചകൾ കണ്ടുള്ള കപ്പൽ യാത്ര വിനോദ സഞ്ചാരികളെ കൂടുതലായി ഇങ്ങോട്ട് ആകർഷിക്കുന്നു.
മജുലി ദ്വീപ്
ബ്രഹ്മപുത്ര നദിയിൽ സ്ഥിതി ചെയ്യുന്ന മജുലി ദ്വീപ് അസമിലാണുള്ളത്. അസമിലെ ജോർഹട്ടയിൽ നിന്നും കടത്തുവള്ളത്തിൽ ഈ ദ്വീപിലേക്ക് വിനോദ സഞ്ചാരികൾക്ക് എത്തിചേരാം. പ്രകൃതി ഭംഗി ആസ്വദിച്ച് ശാന്ത സുന്ദരമായ യാത്ര നടത്താൻ ആഗ്രഹിക്കുന്നവരെ ഈ ദ്വീപ് സ്വാഗതം ചെയ്യുന്നു.
പാമ്പൻ ദ്വീപ്
ഇന്ത്യയ്ക്കും ശ്രീലങ്കയ്ക്കും ഇടയിൽ സ്ഥിതി ചെയ്യുന്ന ഈ ദ്വീപ് രാമേശ്വരം ദ്വീപ് എന്നും അറിയപ്പെടുന്നു. തമിഴ്നാട്ടിലെ ഏറ്റവും വലിയ ദ്വീപാണിത്. അതിഗംഭീരമായ പാലത്തിനു പേരുകേട്ട ഈ ദ്വീപ് മനോഹരമായ തീര കാഴ്ചകൾ പ്രദാനം ചെയ്യുന്നു.
