ന്യൂഡൽഹി : രാജ്യത്തിന് മികച്ച ഹൈവേകളും എക്സ്പ്രസ് വേകളും നൽകിയ കേന്ദ്രമന്ത്രി നിതിൻ ഗഡ്കരി ഇപ്പോൾ പൊതുജനങ്ങൾക്ക് മുന്നിൽ പുതിയൊരു സ്വപ്നം പങ്ക് വയ്ക്കുകയാണ് .
ഭാവിയിൽ ആളുകൾ ഡ്രോണുകൾ വഴി സഞ്ചരിക്കുന്നത് കാണുമെന്നാണ് അദ്ദേഹം പറയുന്നത് . ഡ്രോൺ സെക്ടറിന്റെ ഭാവി വളരെ ശോഭനമാണെന്നും അദ്ദേഹം വിശേഷിപ്പിച്ചിട്ടുണ്ട്. ബയോ ഏവിയേഷൻ ഇന്ധനവും ഉടൻ വിപണിയിലെത്തുമെന്നും പറഞ്ഞു. എഎആർ ഇൻഡ്മറിന്റെ എയർക്രാഫ്റ്റ് മെയിന്റനൻസ്, റിപ്പയർ, ഓവർഹോൾ (എംആർഒ) ഡിപ്പോ ഉദ്ഘാടനം ചെയ്യാൻ എത്തിയതായിരുന്നു അദ്ദേഹം.
വരും കാലങ്ങളിൽ ഡ്രോണുകൾ വളരെയധികം വികസിപ്പിക്കുമെന്ന് നിതിൻ ഗഡ്കരി പറഞ്ഞു. നാല് പേർക്ക് നഗരത്തിൽ നിന്ന് വിമാനത്താവളത്തിലേക്ക് ഡ്രോണുകൾ വഴി യാത്ര ചെയ്യാം.
തന്റെ പഞ്ചസാര ഫാക്ടറിയിൽ ബയോ ഏവിയേഷൻ ഇന്ധനത്തിൽ നടന്നുകൊണ്ടിരിക്കുന്ന പരീക്ഷണത്തെക്കുറിച്ചും അദ്ദേഹം ഇവിടെ പറഞ്ഞു. അരിയിൽ നിന്ന് ബയോ ഏവിയേഷൻ ഇന്ധനം ഉണ്ടാക്കുന്ന കാര്യം പരിഗണനയിലാണെന്നും അദ്ദേഹം പറഞ്ഞു .
ഈ പരീക്ഷണം വിജയിച്ചാൽ വ്യോമയാന വ്യവസായത്തിന് മാത്രമല്ല കർഷകർക്കും ഏറെ പ്രയോജനം ലഭിക്കും. 2026ഓടെ എടിഎഫിൽ ബയോ ഏവിയേഷൻ ഇന്ധനം നിർബന്ധമായും ഉപയോഗിക്കുമെന്നും അദ്ദേഹം പറഞ്ഞു. വൈക്കോലിൽ നിന്ന് എഥനോൾ ഉത്പാദിപ്പിക്കാനുള്ള ഇന്ത്യൻ ഓയിലിന്റെ ശ്രമങ്ങളെയും അദ്ദേഹം അഭിനന്ദിച്ചു
