ഡൽഹി: അടുത്ത സാമ്പത്തിക വർഷത്തിൽ ഇന്ത്യൻ സമ്പദ്‌വ്യവസ്ഥ റെക്കോർഡ് വളർച്ചാ നിരക്കായ 7 ശതമാനത്തിലെത്താൻ സാധ്യതയുണ്ടെന്ന് റിസർവ് ബാങ്ക് ഗവർണർ ശക്തികാന്ത ദാസ്. പണപ്പെരുപ്പം ക്രമാനുഗതമായി കുറയുന്നു, സെൻട്രൽ ബാങ്കിന് 4% ലക്ഷ്യം കൈവരിക്കാൻ കഴിയുമെന്ന് ആത്മവിശ്വാസമുണ്ട്. സമീപ വർഷങ്ങളിൽ നടപ്പാക്കിയ ഘടനാപരമായ പരിഷ്‌കാരങ്ങൾ ഇന്ത്യൻ സമ്പദ്‌വ്യവസ്ഥയുടെ വളർച്ചാ സാധ്യതകൾ ഉയർത്തിയെന്നും ശക്തികാന്ത ദാസ് പറഞ്ഞു. സ്വിറ്റ്‌സർലൻഡിലെ ദാവോസിൽ വേൾഡ് ഇക്കണോമിക് ഫോറം വാർഷിക യോഗത്തോടനുബന്ധിച്ച് നടന്ന സിഐഐ സെഷനിൽ പങ്കെടുത്തുകൊണ്ട് സംസാരിക്കുകയായിരുന്നു അദ്ദേഹം.
“ഇന്ത്യയിൽ ആത്മവിശ്വാസം വർദ്ധിച്ചുകൊണ്ടിരിക്കുകയാണ്. ഇന്ത്യയോടുള്ള അന്താരാഷ്‌ട്ര വിശ്വാസം എക്കാലത്തെയും ഉയർന്ന നിലയിലാണെന്ന് ഞാൻ കരുതുന്നു. നിലവിലെ സാമ്പത്തിക വർഷത്തിൽ ആർബിഐയുടെ വളർച്ചാ പ്രവചനം 7% ആണ്. പണപ്പെരുപ്പം ക്രമാനുഗതമായി കുറയുകയാണ്. സെൻട്രൽ ബാങ്കിന് 4% ലക്ഷ്യം കൈവരിക്കാൻ കഴിയുമെന്ന് ആത്മവിശ്വാസമുണ്ട്. വെല്ലുവിളി നിറഞ്ഞ ആഗോള സാമ്പത്തിക അന്തരീക്ഷത്തിലും ഇന്ത്യയുടെ വളർച്ച സ്ഥിരതയാർന്ന് പോകുന്നു”.
“സമീപ വർഷങ്ങളിൽ നടപ്പാക്കിയ ഘടനാപരമായ പരിഷ്‌കാരങ്ങൾ ഇന്ത്യൻ സമ്പദ്‌വ്യവസ്ഥയുടെ വളർച്ചാ സാധ്യതകൾ ഉയർത്തി. 2022-ൽ ഏറ്റവും ഉയർന്ന നിരക്കിൽ നിന്ന് പ്രധാന പണപ്പെരുപ്പം ഗണ്യമായി കുറഞ്ഞു. ഇത് കാണിക്കുന്നത് ഞങ്ങളുടെ പണ നയ നടപടിയും പണലഭ്യത പുനഃസന്തുലിതമാക്കലും പ്രവർത്തിക്കുന്നു എന്നാണ്. 2024-25-ൽ ഇന്ത്യൻ സമ്പദ്‌വ്യവസ്ഥ 7% വളർച്ച കൈവരിക്കുമെന്ന് ഞങ്ങൾ ഉറച്ച് വിശ്വസിക്കുന്നു”-ശക്തികാന്ത ദാസ് പറഞ്ഞു.
