അയോദ്ധ്യ രാമക്ഷേത്രത്തിൽ എത്താനുള്ള ആഗ്രഹം പ്രകടിപ്പിച്ച് ആഫ്രിക്കൻ സ്വദേശിയും സമൂഹമാദ്ധ്യമ താരവുമായ കിലി പോൾ . ‘പ്രാണ പ്രതിഷ്ഠ’ ചടങ്ങിന് മുമ്പ് അയോദ്ധ്യയിലേക്ക് എത്താനുള്ള ആഗ്രഹമാണ് അദ്ദേഹം പ്രകടിപ്പിച്ചത് . കിലി പോൾ പങ്ക് വച്ച വീഡിയോയിൽ അദ്ദേഹം ‘റാം ശ്രീ റാം’ എന്ന കീർത്തനം ആലപിക്കുന്നതും കാണാം.
വീഡിയോയിൽ കിലി പോൾ തന്റെ പശുക്കൾക്കൊപ്പം നിൽക്കുന്നത് കാണാം. ഈ സമയത്ത്, അദ്ദേഹം ‘റാം ശ്രീ റാം, ശ്രീ റാം ജയ് ജയ് റാം’ എന്ന് വിളിക്കുന്നതും കാണാം. ഉടൻ രാമജന്മഭൂമി സന്ദർശിക്കാൻ ആഗ്രഹിക്കുന്നുവെന്നും അദ്ദേഹം പറഞ്ഞു. ‘ അയോദ്ധ്യയിലേക്ക് വരാൻ ഞാൻ എത്രമാത്രം ഉത്സുകനാണെന്ന് എനിക്ക് മാത്രമേ അറിയൂ. എനിക്കും ചടങ്ങിൽ പങ്കെടുക്കണം. ശ്രീരാമന്റെ അനുഗ്രഹവും വേണം.‘ ഇതോടൊപ്പം ‘ജയ് ശ്രീറാം’ എന്നും കിലി എഴുതിയിട്ടുണ്ട്.
ഇന്ത്യൻ ഗാനങ്ങള്‍ക്കനുസരിച്ചു ചുണ്ടുകൾ ചലിപ്പിച്ചും നൃത്തം ചെയ്തും സമൂഹമാദ്ധ്യമങ്ങളിൽ ദശലക്ഷക്കണക്കിന് ആരാധകരെ നേടിയ താരമാണ് കിലി പോൾ. കിലിക്കൊപ്പം സഹോദരി നീമയും വീഡിയോകളിൽ പ്രത്യക്ഷപ്പെടാറുണ്ട്. ഇവർ പാട്ടുകൾ പാടി വീഡിയോ പങ്കുവയ്‌ക്കുന്നത് വളരെ കുറവാണ്
ടാൻസാനിയയിലെ ഉൾഗ്രാമത്തിലാണ് കിലി പോൾ താമസിക്കുന്നത്. കൃഷിയും പശുവളർത്തലും‌മൊക്കെയായിരുന്നു ഉപജീവനമാർഗം. കുട്ടിക്കാലം മുതൽ ഇന്ത്യൻ സിനിമകളുടെ കടുത്ത ആരാധകനായിരുന്നു കിലി.ഇപ്പോൾ 5 മില്യനിലധികം ഫോളോവേഴ്സ് ആണ് കിലി പോളിന് ഇൻസ്റ്റഗ്രാമിലുള്ളത്.
