ലക്നൗ : ഐതിഹാസിക ടെലവിഷൻ പരമ്പരയായ രാമായണത്തിലെ അഭിനേതാക്കളെ സ്വാഗതം ചെയ്ത് അയോദ്ധ്യ. പരമ്പരയിൽ ശ്രീരാമനായി വേഷമിട്ട അരുൺ ഗോവിൽ, സീതാദേവിയെ അവതരിപ്പിച്ച ദ്വീപിക ചികില ലക്ഷ്മണനായി എത്തിയ സുനിൽ ലഹ്രി എന്നിവർക്കാണ് പ്രാണ പ്രതിഷ്ഠാ ചടങ്ങിലേക്ക് ക്ഷണം ലഭിച്ചത്. ജനുവരി 22-ന് നടക്കുന്ന ഉദ്ഘാടനത്തിനു മുന്നോടിയായി താരങ്ങൾ പരമ്പരാഗത വസ്ത്രങ്ങൾ ധരിച്ച് അയോദ്ധ്യയിൽ എത്തിയതിന്റെ ദൃശ്യങ്ങൾ ഇതിനോടകം തന്നെ സമൂഹ മാദ്ധ്യമങ്ങളിൽ വൈറലായിരുന്നു.
” അയോദ്ധ്യയിലെ രാമക്ഷേത്രം തുറക്കുന്നതോടു കൂടി ക്ഷേത്രം നമ്മുടെ ‘രാഷ്ട്രമന്ദിര’മാണെന്ന് നമ്മൾ തെളിയിക്കും. ഭാരതത്തിന്റെ തനതായ സംസ്കാരവും പൈതൃകവുമാണ് ക്ഷേത്രം ശക്തിപ്പെടുത്തുന്നത്. ഭാരതത്തിന്റെ അഭിമാനവും നമ്മുടെ വിശ്വാസത്തിന്റെ കേന്ദ്രവുമായ ഈ ഭവ്യമന്ദിരം ഓരോ ഭാരതീയനും പ്രചോദനവുമായിരിക്കും ”- അരുൺ ഗോവിൽ പറഞ്ഞു.
View this post on Instagram
ശ്രീരാമചന്ദ്രൻ തിരികെ അയോദ്ധ്യയുടെ മണ്ണിൽ എത്തുമ്പോൾ ‘ഹമാരെ റാം ആയേംഗേ’ എന്ന സംഗീത ആൽബവും മൂന്നു താരങ്ങളും ചേർന്ന് പുറത്തിറക്കുന്നുണ്ട്. പ്രാണ പ്രതിഷ്ഠാ ചടങ്ങിനോടനുബന്ധിച്ച് സിനിമ, സീരിയൽ രംഗങ്ങളിൽ നിന്നുള്ള പ്രമുഖ വ്യക്തികൾക്ക് ക്ഷണം ലഭിച്ചിട്ടുണ്ട്. പ്രാണ പ്രതിഷ്ഠാ ചടങ്ങുകൾക്ക് ശേഷം ജനുവരി 23-നാണ് ഭക്തർക്കായി ക്ഷേത്രം തുറന്നുകൊടുക്കുന്നത്.
