ഭാരതത്തിലെ രണ്ടാമത്തെ ഉയർന്ന സിവിലിയൻ ബഹുമതിയായ പത്മവിഭൂഷൺ സ്വന്തമാക്കിയിരിക്കുകയാണ് തെലുങ്ക് മെഗാസ്റ്റാർ ചിരഞ്ജീവി. കലാരംഗത്ത് നാൽപത് വർഷമായി അദ്ദേഹം നൽകിയ സംഭാവനകൾ പരിഗണിച്ചായിരുന്നു അദ്ദേഹത്തിന് പത്മവിഭൂഷൺ നൽകി ആദരിച്ചത്. ഇന്നലെയാണ് സർക്കാർ പത്മ പുരസ്കാരങ്ങൾ പ്രഖ്യാപിച്ചത്. ഈ വാർത്ത പുറത്തു വന്നതിന് പിന്നാലെ നിരവധി പേരാണ് അദ്ദേഹത്തിന് ആശംസകളുമായി എത്തിയത്. സഹപ്രവർത്തകരും ആരാധകരും അദ്ദേഹത്തെ അഭിനന്ദിച്ച് രംഗത്തെത്തിയിരുന്നു.
Congratulations @KChiruTweets ❤️on the prestigious ‘Padma Vibhushan’! Your contribution to Indian cinema and society at large has played an instrumental role in shaping me and inspiring countless fans. You are an impeccable citizen of this great nation..
Immense gratitude to…
— Ram Charan (@AlwaysRamCharan) January 26, 2024
ഇപ്പോഴിതാ പിതാവിന് ആശംസകൾ അറിയിച്ച് രാം ചരൺ സമൂഹമാദ്ധ്യമങ്ങളിൽ പങ്കുവച്ച കുറിപ്പാണ് ശ്രദ്ധനേടുന്നത്. ‘ചിരഞ്ജീവിക്ക് അഭിമാനകരമായ ‘പത്മവിഭൂഷൺ’! ഇന്ത്യൻ സിനിമയ്ക്കും ഈ സമൂഹത്തിനും നിങ്ങൾ നൽകിയ സംഭാവനകൾ എന്നെ രൂപപ്പെടുത്തുന്നതിലും എണ്ണമറ്റ ആരാധകരെ പ്രചോദിപ്പിക്കുന്നതിലും ഒരു പ്രധാന പങ്ക് വഹിച്ചിട്ടുണ്ട്. ഈ ബഹുമതിക്കും അംഗീകാരത്തിനും ഭാരത സർക്കാരിനും പ്രധാനമന്ത്രി നരേന്ദ്ര മോദിക്കും അങ്ങേയറ്റം നന്ദി. ഒപ്പം ഇത്രയും വലിയൊരു പിന്തുണ നൽകിയതിന് ആരാധകർക്കും നന്ദി എന്നായിരുന്നു രാംചരൺ തേജയുടെ കുറിപ്പ്.’
മമ്മൂട്ടി, ഖുശ്ബു, ജൂനിയർ എൻടിആർ തുടങ്ങി നിരവധി താരങ്ങൾ ചിരഞ്ജീവിക്ക് ആശംസകളുമായി എത്തിയിരിന്നു. തനിക്ക് ആശംസകൾ അറിയിച്ച എല്ലാവരോടും ചിരഞ്ജീവി നന്ദി അറിയിച്ചു. താരം സോഷ്യൽ മീഡിയയിൽ പങ്കുവച്ച കുറിപ്പിന് ചുവടെയും നിരവധി താരങ്ങൾ ആശംസകൾ അറിയിച്ചു. യുവതാരങ്ങളായ നാനി, വരുൺ തേജ തുടങ്ങിയവരും അദ്ദേഹത്തിന് ആശംസകളുമായി എത്തിയിരുന്നു.
