കൊച്ചി: മെസിയുടെ പേര് പറഞ്ഞ് നടത്തിയ തട്ടിപ്പിൽ റിപ്പോർട്ടർ ടിവിക്ക് പിന്തുണയുമായി എസ്ഡിപിഐ. എസ്ഡിപിഐ നേതാക്കൾ ചാനൽ ആസ്ഥാനത്തെത്തി ഒന്നാം പ്രതി ആന്റോയെ നേരിൽ കണ്ടാണ് പിന്തുണ പ്രഖ്യാപിച്ചത്.
മാധ്യമപ്രവർത്തകർക്ക് സ്വതന്ത്രമായി ജോലി ചെയ്യാനുള്ള അവകാശത്തിൽ ഇടപെടുന്ന നടപടികൾ അംഗീകരിക്കാനാകില്ലെന്ന് എസ്ഡിപിഐ നേതാക്കൾ പറഞ്ഞു. സംഭവത്തിൽ വിശദമായ അന്വേഷണം നടത്തി ഉത്തരവാദികൾക്കെതിരെ നടപടി സ്വീകരിക്കണമെന്നും മാധ്യമപ്രവർത്തകർക്ക് ഭയരഹിതമായി ജോലി ചെയ്യാനുള്ള സാഹചര്യം ഉറപ്പാക്കണമെന്നും അവർ ആവശ്യപ്പെട്ടു.
എസ്ഡിപിഐ ജില്ലാ പ്രസിഡന്റ് അജ്മൽ കെ. മുജീബ്, ജില്ലാ സെക്രട്ടറി എൻ.കെ. നൗഷാദ്, ജില്ലാ സെക്രട്ടറിയേറ്റ് അംഗം സി.എസ്. ഷാനവാസ്, ജില്ലാ കമ്മിറ്റിയംഗം സഈദ് വാഴക്കുളം എന്നിവരാണ് ചാനൽ ആസ്ഥാനം സന്ദർശിച്ചത്.
മെസ്സിയുടെ പേരിൽ നടന്ന തട്ടിപ്പുമായി ബന്ധപ്പെട്ടാണ് റിപ്പോർട്ടർ ടിവിക്കെതിരെ നിയമനടപടികൾ തുടരുന്നത്. വിദേശ മദ്യം സൂക്ഷിച്ച കേസിൽ ആന്റോ അഗസ്റ്റിൻ അറസ്റ്റിലായതിന് മണിക്കൂറുകൾക്ക് മുമ്പാണ് എസ്ഡിപിഐ നേതാക്കൾ ചാനൽ ആസ്ഥാനത്തെത്തിയത്.
