ന്യൂഡൽഹി: 75-ാമത് റിപ്പബ്ലിക് ദിനാഘോഷ പരേഡിൽ ചരിത്രമെഴുതി കോസറ്റ് ഗാർഡിന്റെ ബാൻഡ് സംഘം. കോസ്റ്റ് ഗാർഡ് ബാൻഡ് സ്ഥാപിതമായി 16 വർഷമായെങ്കിലും ഇതാദ്യമായാണ് റിപ്പബ്ലിക് പരേഡിൽ പങ്കെടുക്കുന്നത്. ഗാർഡിന്റെ 24 പേരടങ്ങുന്ന ബാൻഡ് സംഘത്തെ നയിച്ച കമാൻഡർ ഉൾപ്പെടെയുള്ള നാല് പേർ മലയാളികളാണ്.
മലപ്പുറം സ്വദേശി ഗോപാൽ ബാബുവാണ് ബാൻഡ് സംഘത്തെ നയിച്ചത്. മലപ്പുറം സ്വദേശി വിവേക് പുന്നത്ത്, ചാലക്കുടി സ്വദേശി സിജോ ചേലേക്കാട്ട്, തിരുവനന്തപുരം സ്വദേശി കെ.എസ്. ബിജോയ് സംഘത്തിലെ മറ്റ് മലയാളികൾ.
ഗോപാൽ ബാബു സംഗീതം നിർവഹിച്ച ‘സുരക്ഷ’ എന്ന മാർച്ചിംഗ് ട്യൂണാണ് ബാൻഡ് സംഘം വായിച്ചത്. കൂടാതെ ‘സാരേ ജഹാൻസെ അച്ഛാ’ എന്ന ദേശഭക്തിഗാനവും ബാൻഡ് സംഘം വായിച്ചു. പരേഡിൽ എയർഫോഴ്സ് കണ്ടിജെന്റിന് ശേഷമാണ് കോസ്റ്റ് ഗാർഡിന്റെ ബാൻഡും പ്ലാറ്റൂണും മാർച്ച് ചെയ്തത്.
