ഓസ്ട്രേലിയൻ ഓപ്പൺ പുരുഷ ഡബിൾസിൽ കീരിടം നേടിയ രോഹൻ ബൊപ്പണയെ പ്രശംസിച്ച് പ്രധാനമന്ത്രി നരേന്ദ്രമോദി. എക്സിലൂടെയാണ് അദ്ദേഹം ബൊപ്പണയ്ക്ക് ആശംസകൾ നേർന്നത്.
വീണ്ടും വീണ്ടും ബൊപ്പണ കഴിവ് തെളിയിക്കുകയാണ്. വിജയങ്ങൾ നേടാൻ പ്രായമൊരു തടസ്സമല്ലെന്ന് ഈ വിജയത്തിലൂടെ അദ്ദേഹം കാണിച്ചുതന്നു. ഓസ്ട്രേലിയൻ ഓപ്പണിൽ ചരിത്രവിജയം സ്വന്തമാക്കിയ ബൊപ്പണയ്ക്ക് അഭിനന്ദനങ്ങൾ. നമ്മുടെ നേട്ടങ്ങളെ നിർണയിക്കുന്നത് കഠിനാധ്വാനവും പരിശ്രമവുമാണെന്ന് അദ്ദേഹത്തിന്റെ കായിക ജീവിതം നമ്മെ ഓർമ്മിപ്പിക്കുന്നു. ഭാവിയിലെ അദ്ദേഹത്തിന്റെ നേട്ടങ്ങൾക്ക് ആശംസകൾ നേരുന്നതായും പ്രധാനമന്ത്രി എക്സിൽ കുറിച്ചു.
ഇതോടെ ഗ്രാൻഡ് സ്ലാം നേടുന്ന ഏറ്റവും പ്രായം കൂടിയ പുരുഷ താരമായി 43-കാരനായ രോഹൻ ബൊപ്പണ്ണ മാറി. ഓസ്ട്രേലിയൻ ഓപ്പൺ 2024ൽ ബൊപ്പണ്ണയും ഓസ്ട്രേലിയൻ താരം മാത്യു എബ്ഡനും ചേർന്ന സഖ്യം പുരുഷ ഡബിൾസ് കിരീടം സ്വന്തമാക്കിയതോടെയാണിത്. ബൊപ്പണ്ണയുടെ കരിയറിലെ ആദ്യ പുരുഷ ഡബിൾസ് ഗ്രാൻഡ് സ്ലാം കിരീടമാണിത്. പുരുഷ ഡബിൾസ് ഗ്രാൻഡ് സ്ലാം കിരീടം നേടുന്ന മൂന്നാമത്തെ ഇന്ത്യൻ താരമാണ് ബൊപ്പണ.
