ന്യൂഡല്‍ഹി: കരിപ്പൂരില്‍ നിന്നുള്ള ഹജ്ജ് യാത്രാ നിരക്ക് കുറച്ചു. കേരളം ആവശ്യപ്പെട്ടതിന്റെ പിന്നാലെ കേന്ദ്ര ന്യൂനപക്ഷ ക്ഷേമ മന്ത്രി സ്മൃതി ഇറാനിയാണ് നടപടി കൈക്കൊണ്ടത്.
നേരത്തെയുണ്ടായിരുന്ന നിരക്കില്‍നിന്ന് 38,000 രൂപയാണ് കുറച്ചത് . 1,27,000 രൂപയാണ് പുതിയ നിരക്ക്. കരിപ്പൂരില്‍ നിന്ന് 1.60 ലക്ഷം രൂപയാണ് ടിക്കറ്റ് നിരക്ക് കണക്കാക്കിയിരിക്കുന്നത്. കേന്ദ്ര സര്‍ക്കാരിന്റെ ടെണ്ടര്‍ നടപടികള്‍ വഴിയാണ് ഈ നിരക്ക് നിശ്ചയിച്ചത്. കോഴിക്കോട് നിന്നും എയര്‍ ഇന്ത്യയും, കണ്ണൂരില്‍ നിന്നും കൊച്ചിയില്‍ നിന്നും സൗദി എയര്‍ലൈന്‍സുമാണ് സര്‍വീസിന് അര്‍ഹത നേടിയത്.
കേരളത്തില്‍ നിന്നും കഴിഞ്ഞവര്‍ഷം 11556 തീര്‍ത്ഥാടകരാണ് ഹജ്ജ് തീര്‍ത്ഥാടനം നടത്തിയത്. ഇതില്‍ 7045 പേരും കോഴിക്കോട് നിന്നാണ് യാത്ര ചെയ്തത് . നേരത്തേ ബിനോയ് വിശ്വം എം പി യും ഹജ്ജുകാരിൽ നിന്ന് ന്യായമായ ചാർജ് മാത്രമേ ഈടാക്കാവൂ എന്ന് ആവശ്യപ്പെട്ടിരുന്നു.
