ലോക സിനിമയിൽ ഏറ്റവും അധികം അത്ഭുതങ്ങൾ സൃഷ്ടിച്ച സിനിമകളിലൊന്നാണ് അവതാർ. ചിത്രത്തിന്റെ മൂന്നാം ഭാഗത്തിനായാണ് ആരാധകർ ഇപ്പോൾ കാത്തിരിക്കുന്നത്. ചിത്രം ഈ വർഷം അവസാനത്തോടെ തിയേറ്ററിലെത്തുമെന്നായിരുന്നു ആദ്യം അറിയിച്ചിരുന്നത്. എന്നാൽ, പിന്നീട് റിലീസ് തീയതി മാറ്റിയതായി അണിയറപ്രവർത്തകർ അറിയിച്ചിരുന്നു. ‘അവതാർ 3’ 2025-ൽ എത്തുമെന്നാണ് അണിയറപ്രവർത്തകർ അവസാനമായി അറിയിച്ചത്.
ഇപ്പോഴിതാ, ചിത്രത്തെ സംബന്ധിച്ച് മറ്റൊരു അപ്ഡേഷനാണ് പുറത്ത് വന്നത്. മൂന്നാം ഭാഗത്തിന്റെ ചിത്രീകരണം പൂർത്തിയായിരിക്കുകയാണ്. ചിത്രം 2025 ക്രിസ്മസിന് തീയേറ്ററിലെത്തുമെന്നാണ് അന്താരാഷ്ട്ര മാദ്ധ്യമങ്ങൾ റിപ്പോർട്ട് ചെയ്യുന്നത്. അവതാർ 3-ന്റെ ഇതിവൃത്തത്തെ കുറിച്ചുള്ള വിവരങ്ങളൊന്നും ജയിംസ് കാമറൂൺ ഇതുവരെയും പുറത്ത് വിട്ടിട്ടില്ല. രണ്ടാം ഭാഗത്തിന്റെ തുടർച്ച തന്നെയാകും മൂന്നാം ഭാഗമെന്ന സൂചനകൾ മാത്രമാണ് നൽകിയിരുന്നത്.
അവതാറിന് തുടർ ഭാഗങ്ങൾ ഉണ്ടാകുമെന്ന് 2012-ലായിരുന്നു ജയിംസ് കാമറൂൺ പ്രഖ്യാപിച്ചത്. ചിത്രങ്ങളുടെ റിലീസും അതോടൊപ്പം പുറത്ത് വിട്ടിരുന്നു. രണ്ടാം ഭാഗം 2020 ഡിസംബറിലും മൂന്നാം ഭാഗം 2021 ഡിസംബര് 17നും നാലാം ഭാഗം 2024 ഡിസംബര് 20നും അഞ്ചാം ഭാഗം 2025 ഡിസംബര് 19നും റിലീസ് ചെയ്യുമെന്നായിരുന്നു പ്രഖ്യാപനം. എന്നാൽ, കൊറോണ ലോകത്തെ ബാധിച്ചതിനെ തുടർന്ന് റിലീസ് തീയതികൾക്കും വർഷങ്ങളുടെ വ്യത്യാസം വന്നു.
2020 ഡിസംബറിലെത്തുമെന്ന് പ്രഖ്യാപിച്ച രണ്ടാം ഭാഗം 2022ലായിരുന്നു തിയേറ്ററുകളിലെത്തിയത്. ‘അവതാര് – ദ വേ ഓഫ് വാട്ടര്’ എന്നായിരുന്നു രണ്ടാം ഭാഗത്തിന്റെ പേര്. മൂന്നാം ഭാഗം അടുത്ത വർഷം അവസാനത്തോടെ എത്തും.
