ന്യൂഡൽഹി: റിപ്പബ്ലിക് ദിനാഘോഷങ്ങൾക്കായി ഇന്ത്യയിലെത്തിയതിന്റെ വീഡിയോ പങ്കുവച്ച് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ. ഡൽഹിയിൽ നടന്ന 75ാം റിപ്പബ്ലിക് ദിനാഘോഷത്തിലെ മുഖ്യാതിഥിയായിരുന്നു ഇമ്മാനുവൽ മാക്രോൺ. ഇന്ത്യയിൽ നടത്തിയ വിശേഷപ്പെട്ട ഒരു യാത്രയിലേക്കുള്ള തിരിഞ്ഞുനോട്ടമാണെന്ന അടിക്കുറിപ്പോടെയാണ് എക്സിൽ ഈ വീഡിയോ പങ്കുവച്ചിരിക്കുന്നത്.
പ്രധാനമന്ത്രി ആതിഥ്യമരുളുന്നതും, പ്രാദേശിക വിഭവങ്ങൾ ആസ്വദിക്കുന്നതും, ജയ്പൂരിൽ നടത്തിയ യാത്രയുടേയും, റിപ്പബ്ലിക് ദിനാഘോഷങ്ങളിൽ നിന്നുള്ള പ്രസക്ത ഭാഗങ്ങളുമാണ് വീഡിയോയിൽ ഉൾക്കൊള്ളിച്ചിരിക്കുന്നത്. ലോകത്തിന്റെയാകെ പരിവർത്തനത്തിൽ ഇന്ത്യ എന്നും മുൻപന്തിയിലായിരിക്കുമെന്നും, ഇന്ത്യയിൽ കൂടുതൽ നിക്ഷേപം നടത്താൻ ഫ്രാൻസ് ആഗ്രഹിക്കുന്നുണ്ടെന്നും വീഡിയോയിൽ മാക്രോൺ പറയുന്നു.
ഇരുരാജ്യങ്ങളും തമ്മിലുള്ള ഉഭയകക്ഷി ബന്ധത്തെ കുറിച്ചും വീഡിയോയിൽ വ്യക്തമാക്കുന്നുണ്ട്. ” ഇത്തരമൊരു ദിവസത്തിന്റെ ഭാഗമാകാൻ കഴിഞ്ഞതിലൂടെ അങ്ങേയറ്റം ബഹുമാനിക്കപ്പെട്ടു. ഇത് എന്നും ഞങ്ങളുടെ ഓർമ്മകളിൽ ഉണ്ടായിരിക്കും. കഴിഞ്ഞ കുറച്ച് വർഷങ്ങൾ കൊണ്ട് വിവിധ മേഖലകളിൽ സഹകരണവും പങ്കാളിത്തവും വർദ്ധിപ്പിച്ചു. ഇന്ത്യയിൽ ഇനിയും നിക്ഷേപങ്ങൾ നടത്താനാണ് ഫ്രാൻസ് ആഗ്രഹിക്കുന്നത്. ഇപ്പോഴുള്ള ബന്ധം ഏറ്റവും മികച്ചതാണെങ്കിലും ഇനിയും നമുക്ക് ധാരാളം കാര്യങ്ങൾ ചെയ്യാൻ സാധിക്കുമെന്നും” മാക്രോൺ പറയുന്നു.
