ചെന്നെെ: തമിഴ് നടൻമാർ രാഷ്ട്രീയത്തിലേക്ക് പ്രവേശിക്കുന്നത് പതിവ് കാഴ്ചയായി മാറിയിരിക്കുകയാണ്. നടൻ വിശാലും രാഷ്ട്രീയത്തിലേക്ക് പ്രവേശിക്കുന്നുവെന്ന് വാർത്തകൾ പടർന്നിരുന്നു. എന്നാൽ, താൻ രാഷ്ട്രീയ പ്രവേശനത്തിന് ആഗ്രഹിക്കുന്നില്ലെന്ന് വെളിപ്പെടുത്തി രംഗത്ത് എത്തിയിരിക്കുകയാണ് വിശാൽ. തന്റെ ഫാൻസ് ക്ലബ് വഴി ദുരിതമനുഭവിക്കുന്ന ആളുകളെ സഹായിക്കാനാണ് ഉദ്ദേശിക്കുന്നതെന്നും വിശാൽ പറയുന്നു. സമൂഹമാദ്ധ്യമത്തിലൂടെ പുറത്ത് വിട്ട പ്രസ്താവനയിലാണ് ഇക്കാര്യം വെളിപ്പെടുത്തിയിരിക്കുന്നത്.
‘ഒരു നടനായും സാമൂഹിക പ്രവർത്തകനായും എന്നെ അംഗീകരിച്ച തമിഴ്നാട്ടിലെ ജനങ്ങളോട് ഞാൻ കടപ്പെട്ടിരിക്കുന്നു. പരമാവധി ആളുകളെ സഹായിക്കുക എന്ന ലക്ഷ്യമാണെനിക്കുള്ളത്. എന്റെ ഫാൻസ് ക്ലബ് വഴി ജനങ്ങൾക്ക് ഉപകാരപ്രദമായ കാര്യങ്ങൾ ചെയ്യാൻ ഞാൻ ശ്രമിക്കുന്നുണ്ട്. ഞാൻ ഫാൻസ് ക്ലബ് നടത്തുന്നതിന്റെയും ലക്ഷ്യം ജനങ്ങളെ സഹായിക്കുക എന്നത് തന്നെയാണ്.
എന്റെ അമ്മയുടെ പേരിൽ നടത്തുന്ന ‘ദേവി ഫൗണ്ടേഷൻ’ വഴി ഞങ്ങൾ എല്ലാ വർഷവും ദരിദ്രരായ വിദ്യാർത്ഥികളെ സഹായിക്കുന്നുണ്ട്. ഷൂട്ടിംഗിന് പോകുന്ന വേളയിൽ ആളുകളെ കാണുകയും അവരുടെ ആവശ്യങ്ങൾ നിറവേറ്റുകയും ചെയ്യുന്നത് ഫാൻസ് ക്ലബിലൂടെയാണ്. രാഷ്ട്രീയ നേട്ടത്തിന് വേണ്ടിയല്ല ദുരിതങ്ങൾ അനുഭവിക്കുന്നവരെ സഹായിക്കുന്നത്. ഭാവിയിൽ ഇനി ജനങ്ങൾക്ക് വേണ്ടി സംസാരിക്കേണ്ടി വന്നാൽ സംസാരിക്കും.’- വിശാൽ പറഞ്ഞു.