മോർച്ചറിയ്ക്ക് സമമാണ് ഫ്രിഡ്ജ് എന്ന് പഴമക്കാർ പറയുന്നത് എപ്പോഴെങ്കിലും നാം കേട്ടിട്ടുണ്ടാകും. ഇടയ്ക്കൊന്ന് ഫ്രിഡ്ജ് തുറന്നു നോക്കിയാൽ സംഭവം ശരിയാണെന്ന് നമുക്കും തോന്നിപോകുന്ന വിധത്തിലായിരിക്കും നമ്മുടെ ഫ്രിഡ്ജുകളുടെ അവസ്ഥ. കറിയായാലും, ചോറായാലും എന്തും ബാക്കി വന്നാൽ നേരെ ഫ്രിഡ്ജിലേക്കായിരിക്കും നമ്മുടെ കൈകൾ നീളുക. എന്നാൽ ഇത്തരത്തിൽ ഭക്ഷണങ്ങൾ കയറ്റി വയ്ക്കുമ്പോൾ ചില കാര്യങ്ങൾ ശ്രദ്ധക്കാനുണ്ട്. ചില ഭക്ഷണങ്ങൾ ഇത്തരത്തിൽ എടുത്ത് വച്ച് പിന്നീട് കഴിക്കുന്നത് ശരീരത്തിന് ദോഷമായി ബാധിച്ചേക്കാം..
ചോറ്
തലേദിവസം ബാക്കി വരുന്ന ചോറ് നേരെ ഫ്രിഡ്ജിൽ വയ്ക്കുകയാണ് ഭൂരിഭാഗം വീടുകളിലും ചെയ്യുന്നത്. എന്നാൽ ഇങ്ങനെ ചെയ്യുന്നത് ചോറിൽ പൂപ്പൽ വരാനുള്ള സാധ്യത വർദ്ധിപ്പിക്കുന്നു. കൂടാതെ ചോറിന്റെ അന്നജത്തിന്റെ അളവ് വർദ്ധിക്കാനും കാരണമാകുന്നു. ഇത് രക്തത്തിലെ പഞ്ചസാരയുടെ അളവ് വർദ്ധിപ്പിക്കുകയും പ്രമേഹം പോലുള്ള രോഗങ്ങളിലേക്കും ഇത് തള്ളിവിടുന്നു. അതിനാൽ നല്ലതുപോലെ ചൂടാക്കിയതിനു ശേഷം ചോറ് കഴിക്കാൻ ശ്രദ്ധിക്കുക.
സവാള
തലേദിവസം അരിഞ്ഞ് ഫ്രിഡ്ജിൽ വച്ചാൽ എളുപ്പത്തിൽ ഉപയോഗിക്കാമല്ലോ എന്നു കരുതി സവാള എടുത്തു വയ്ക്കുന്നവരായിരിക്കും നമ്മിൽ ഭൂരിഭാഗവും. എന്നാൽ കുറഞ്ഞ താപനില പ്രതിരോധിക്കാനുള്ള ശേഷി ഉള്ളി വർഗങ്ങൾക്ക് പൊതുവെ കുറവാണ്. അതിനാൽ ഇവയിൽ എളുപ്പത്തിൽ ബാക്ടീരിയകൾ പടരാൻ കാരണമാകുന്നു. ഇത് ഭക്ഷ്യവിഷബാധയ്ക്കും കാരണമാകും.
ഇഞ്ചി
ഫ്രിഡ്ജിൽ ഇഞ്ചി സൂക്ഷിക്കുമ്പോൾ പെട്ടന്ന് പൂപ്പൽ പിടിപ്പെടാനുള്ള സാധ്യത കൂടുതലാണ്. ഇതിൽ കാണപ്പെടുന്ന പൂപ്പൽ വൃക്ക, കരൾ തുടങ്ങിയ അവയവങ്ങളെ ദോഷമായി ബാധിക്കുന്നു. ശരീരത്തിന്റെ രോഗപ്രതിരോധശേഷി ഇല്ലാതാക്കാനും ഇത് കാരണമാകുന്നു.
