ന്യൂഡൽഹി: രാമരാജ്യമെന്ന ആശയം ആദ്യം സ്വപ്‌നം കണ്ടത് മഹാത്മാഗാന്ധിയായിരുന്നുവെന്ന് ആചാര്യ പ്രമോദ് കൃഷ്ണം. ആ സ്വപ്‌നം യാഥാർത്ഥ്യമാക്കുകയാണ് പ്രധാനമന്ത്രി നരേന്ദ്രമോദി ചെയ്തത്. രാജ്യത്തെ ജനങ്ങളുടെ ക്ഷേമത്തിന് വേണ്ടി പ്രധാനമന്ത്രി എടുക്കുന്ന തീരുമാനങ്ങൾ അഭിനന്ദനാർഹമാണ്. പാർട്ടി വിരുദ്ധ പ്രവർത്തനങ്ങൾ നടത്തിയെന്നാരോപിച്ച് കോൺഗ്രസിൽ നിന്ന് പുറത്താക്കിയതിന് പിന്നാലെ പ്രതികരിക്കുകയായിരുന്നു അദ്ദേഹം.
ഞാൻ കോൺഗ്രസിന്റെ ജോലിക്കാരനല്ല, അതൊരു ജോലിയായി ഞാൻ കണ്ടിട്ടുമില്ല. രാജ്യത്തിന്റെ പുരോഗതിക്കായി നല്ല തീരുമാനങ്ങൾ കൈക്കൊള്ളുന്ന പ്രധാനമന്ത്രിയെ കോൺഗ്രസ് വെറുക്കുകയാണ്. ഇതിലൂടെ അവർ രാജ്യത്തെയും വെറുക്കുകയാണ്. സനാതന ധർമ്മത്തെ ഇല്ലാതാക്കാനാണ് ഇവർ ആഗ്രഹിക്കുന്നത്. പ്രധാനമന്ത്രിയെ കാണുന്നവരെ പോലും കോൺഗ്രസ് വെറുക്കുകയാണ്. ഇങ്ങനെയൊരു അവസരത്തിൽ എന്നെ പാർട്ടിയിൽ നിന്ന് പുറത്താക്കുന്നതിൽ നിർണായക പങ്ക് വഹിച്ച കോൺഗ്രസ് നേതാക്കൾക്ക് നന്ദി പറയാൻ ഞാൻ ആഗ്രഹിക്കുന്നു.- അദ്ദേഹം പറഞ്ഞു.
താൻ കോൺഗ്രസുമായി ഒരു വിട്ടുവീഴ്ചയ്‌ക്കുമില്ലെന്നും അദ്ദേഹം തുറന്നടിച്ചു. ”രാമന്റെയും രാഷ്‌ട്രത്തിന്റെയും കാര്യത്തിൽ ഒരു വിട്ടുവീഴ്ചയ്‌ക്കുമില്ല” എന്നാണ് അദ്ദേഹം എക്‌സിൽ രാഹുലിന് മറുപടി നൽകിയത്.
