നെയ്‌റോബി: മാരത്തൺ ലോക റെക്കോർഡിന് ഉടമയായ കെൽവിൻ കിപ്റ്റവും പരിശീലകൻ ഗർവൈസ് ഹകിസിമാനയും വാഹനാപകടത്തിൽ മരിച്ചു. ഇന്നലെ രാത്രി കെനിയയിലെ എൽദോററ്റിലുണ്ടായ അപകടത്തിലാണ് ഇരുവരുടെയും ജീവൻ നഷ്ടമായത്. അപകടസമയത്ത് 24കാരനായ കെൽവിൻ കിപ്റ്റമാണ് വാഹനമോടിച്ചിരുന്നത്. ഇരുവരും അപകടസ്ഥലത്ത് വച്ചുതന്നെ മരിച്ചു.
വാഹനത്തിലുണ്ടായിരുന്ന മറ്റൊരാൾ ഗുരുതര പരിക്കുകളോടെ ആശുപത്രിയിലാണ്. നിയന്ത്രണം നഷ്ടപ്പെട്ട വാഹനം താഴ്ചയിലേക്ക് മറിഞ്ഞ ശേഷം മരത്തിലിടിച്ചാണ് നിന്നത്. കഴിഞ്ഞ വർഷം ഒക്ടോബറിൽ നടന്ന ചിക്കാഗോ മാരത്തണിലാണ് താരം റെക്കോർഡിട്ടത്. 2:00:35 സമയം കൊണ്ടാണ് കെൽവിൻ മത്സരം പൂർത്തിയാക്കിയത്.
കെൽവിന്റെ പരിശീലകനായിരുന്ന ഹകിസിമാന (36) റുവാണ്ടൻ അത്‌ലറ്റായിരുന്നു. 5000 മീറ്റർ മുതൽ ഹാഫ് മാരണത്തിൽ വരെ ഹകിസിമാന പങ്കെടുത്തിട്ടുണ്ട്.
