നവാഗതനായ ആദിത്യ സുഹാസ് ജാംബലെ സംവിധാനം ചെയ്യുന്ന ആർട്ടിക്കിൾ 370 ന്റെ ഒഫീഷ്യൽ ട്രെയിലർ സമൂഹമാദ്ധ്യമങ്ങളിൽ വൻ തരംഗം സൃഷ്ടിക്കുന്നു. ട്രെയിലർ പുറത്തിറങ്ങി ദിവസങ്ങൾക്കുള്ളിൽ രണ്ട് കോടിയിലധികം പേരാണ് ട്രെയിലർ കണ്ടിരിക്കുന്നത്. കശ്മീർ വിഘടനവാദത്തെ തകർക്കാൻ കേന്ദ്ര സർക്കാർ ആർട്ടിക്കിൾ 370 പിൻവലിച്ച നടപടിയും തുടർന്നുണ്ടാകുന്ന സംഭവ വികാസങ്ങളുമാണ് ട്രെയിലറിൽ പരാമർശിച്ചിരിക്കുന്നത്.
ട്രെയിലറിനേയും ഓരോ കഥാപാത്രങ്ങളെയും പരാമർശിച്ച് നിരവധി പേർ ട്രെയിലർ ഷെയർ ചെയ്തിട്ടുമുണ്ട്. ഓരോ കഥാപാത്രങ്ങളും ഓരോ ഓരോ ഫ്രയിമും രോമാഞ്ചം കൊള്ളിക്കുന്നു. അമിത്ഷാ ജിയുടെ പ്രസംഗം… ഇത്തരത്തിലുള്ള നിനിരവധി കമന്റുകളും ട്രെയിലറിന് താഴെ ആരാധകർ കുറിച്ചിട്ടുണ്ട്.
ആർട്ടിക്കിൾ 370 പിൻവലിക്കാൻ കേന്ദ്രസർക്കാർ സ്വീകരിച്ച മുന്നൊരുക്കങ്ങളും ഇതിനായി രഹസ്യമായി താഴ്വരയിൽ പ്രവർത്തിച്ച സുരക്ഷാസേനയിലെ പ്രത്യേക ടീമിന്റെയും കഥയാണ് ചിത്രത്തിന്റെ ഇതിവൃത്തം. യഥാർത്ഥ സംഭവങ്ങൾ കൂട്ടിയിണക്കിക്കൊണ്ടുള്ള ചിത്രത്തിൽ യാമിഗൗതമും പ്രിയാ മണിയുമാണ് കേന്ദ്ര കഥാപാത്രങ്ങളെ അവതരിപ്പിച്ചിരിക്കുന്നത്. രാമായണം ടെലി സീരിയലിൽ ശ്രീരാമനെ അവതരിപ്പിച്ച അരുൺ ഗോവിൽ ചിത്രത്തിൽ പ്രധാനമന്ത്രി നരേന്ദ്രമോദിയായി എത്തുന്നു.
‘ഉറി ദ സർജിക്കൽ സ്ട്രൈക്ക്’ സിനിമയുടെ സംവിധായകൻ ആദിത്യ ധാർ, മൊണാൽ താക്കർ എന്നിവർ ചേർന്നാണ് സിനിമയുടെ കഥയും തിരക്കഥയും ഒരുക്കിയിരിക്കുന്നത്. കുമാറിന്റെ വരികൾക്ക് ശാശ്വത് സച്ദേവാണ് സംഗീതം നൽകുന്നത്. ജ്യോതി ദേശ്പാണ്ഡെയ്ക്കൊപ്പം ആദിത്യ ധാർ, ലോകേഷ് ധാർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. ഈ മാസം 23 ന് സിനിമ തീയേറ്ററുകളിലെത്തും.
