ന്യൂഡൽഹി: പ്രധാനമന്ത്രി നരേന്ദ്രമോദിക്ക് ഔപചാരിക സ്വീകരണം നൽകി ഖത്തർ. രാജ്യത്തിന്റെ പാരമ്പര്യ രീതിയിലുള്ള ആചാരപരമായ വരവേൽപ്പ് നൽകിയായിരുന്നു പ്രധാനമന്ത്രിയെ ഖത്തർ അമീർ സ്വീകരിച്ചത്. ശേഷം ഖത്തർ അമീറുമായി അദ്ദേഹം ഉഭയകക്ഷി ചർച്ച നടത്തി. വിദേശകാര്യ മന്ത്രി എസ് ജയ്ശങ്കർ, ദേശീയ സുരക്ഷാ ഉപദേഷ്ടാവ് അജിത് ഡോവൽ എന്നിവരും ചർച്ചയിൽ പങ്കെടുത്തു.
രണ്ട് ദിവസത്തെ സന്ദർശനത്തിനായി പ്രധാനമന്ത്രി ഇന്നലെ വൈകിട്ടാണ് ഖത്തറിന്റെ തലസ്ഥാനമായ ദോഹയിലെത്തിയത്. ഊഷ്മളമായ വരവേൽപ്പാണ് ഇന്നലെ അദ്ദേഹത്തിന് ലഭിച്ചത്. പിന്നാലെ ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൽറഹ്മാൻ അൽതാനിയുമായി അദ്ദേഹം കൂടിക്കാഴ്ച നടത്തിയിരുന്നു.
വ്യാപാരം, നിക്ഷേപം, ഊർജം, ധനകാര്യം, സാങ്കേതിക വിദ്യ തുടങ്ങിയ മേഖലകളിൽ ഉഭയകക്ഷി സഹകരണം വിപുലീകരിക്കുന്നത് സംബന്ധിച്ചുള്ള കാര്യങ്ങളാണ് ഇരുവരും ഇന്നലെ ചർച്ച ചെയ്തത്. പശ്ചിമേഷ്യയിലെ സമീപകാല പ്രാദേശിക സംഭവവികാസങ്ങളും ചർച്ച നടത്തി. പ്രശ്നമേഖലകളിൽ സമാധാനവും സ്ഥിരതയും ഉയർത്തിപ്പിടിക്കേണ്ടതിന്റെ പ്രാധാന്യത്തെ കുറിച്ചും ചർച്ച നടത്തി.