മുംബൈ: റെയിൽവെ യാത്രയുമായി ബന്ധപ്പെട്ട വിഷയങ്ങളിൽ അടിയന്തിരമായി പരിഹാരം കാണണമെന്നാവശ്യപ്പെട്ട് കേന്ദ്ര റയിൽവേ സഹമന്ത്രിയെ സന്ദർശിച്ച് കേരള സമാജം സൂറത്ത്‌ നിവേദനം നൽകി. പ്രസിഡന്റ് സുനിൽ നമ്പ്യാരാണ് സഹമന്ത്രി ദർശന ജർദോഷിന് നിവേദനം നൽകിയത്.
മദ്ധ്യവേനലവധിക്കാലത്തെ യാത്രാ പ്രയാസങ്ങൾ ഒഴിവാക്കുന്നതിനായി ഗുജറാത്തിൽ നിന്ന് കേരളത്തിലേക്കും, തിരിച്ചും പ്രത്യേക ട്രെയിനുകൾ അനുവദിക്കണമെന്നും, ട്രെയിൻ യാത്രകൾക്കിടയിൽ വർദ്ധിച്ചു വരുന്ന മോഷണങ്ങൾ തടയാൻ സുരക്ഷാ സംവിധാനങ്ങൾ ഒരുക്കണമെന്നും നിവേദനത്തിൽ ആവശ്യപ്പെട്ടതായി ഭാരവാഹികൾ അറിയിച്ചു.
വൃത്തിഹീനമാവുന്ന കോച്ചുകളും, ശുചിമുറികളും വൃത്തിയാക്കി യാത്രക്കാർക്ക് സംതൃപ്തിയോടെയുള്ള യാത്രയൊരുക്കാൻ ഉദ്യോഗസ്ഥർക്ക് നിർദേശം നൽകണമെന്നും നിവേദനത്തിൽ പറയുന്നു. വിഷയത്തിൽ ആവശ്യമായ നടപടികൾ സ്വീകരിക്കാം എന്ന് മന്ത്രി അറിയിച്ചതായി ഭാരവാഹികൾ പറഞ്ഞു.
